विदुर नगरपालिका तोडफोड प्रकरण : ६ जना वडाध्यक्षविरुद्ध उजुरी

नुवाकोट । नुवाकोटको विदुर नगरपालिकाको कार्यालयमा सोमवार भएको तोडफोडको घटनालाई लिएर विदुर नगरपालिकाले आफै वडाका ६ जना वडाध्यक्षविरुद्ध प्रहरी र प्रशासनमा उजुरी दर्ता गराएको छ ।

नगरपालिकाको कार्यालयले उनीहरुविरुद्द फौजदारी संहिता २०६४ अनुसार कारवाहीको माग गर्दे जिल्ला प्रशासन कार्यालय र जिल्ला प्रहरी कार्यालयमा उजुरी दर्ता गराएको हो ।नगरपालिका तोडफोड गरेको आरोपमा विदुर नगरपालिका वडा नम्बर २ का वडाध्यक्ष विरेन्द्रकुमार शाही, वडा नम्बर ३ का वडाध्यक्ष बद्री रिमाल, वडा नम्बर ७ का वडाध्यक्ष महेन्द्र तामाङ, वडा नम्बर ८ का वडाध्यक्ष फैसिङ तामाङ, वडा नम्बर १० का वडाध्यक्ष गणेशकुमार नेपाल, वडा नम्बर १३ का वडाध्यक्ष दलवहादुर तामाङविरुद्ध मुद्धा दर्ता गरि कारवाहीको माग गरिएको छ ।

सोमवार विदुर नगरपालिका वडा नम्बर १३ मा कार्यान्यनमा आएको सुन्तला कागती पकेट क्षेत्रको सम्बन्धित काममा अनियमितता भएको भन्दै कांग्रेस कार्यकर्ताहरुले नगरपालिकामा तालाबन्दी गर्ने क्रममा नगरपालिकाको कार्यालयमा तोडफोड गरिएको थियो । झडपमा परि कांग्रेसको तर्फबाट विदुर नगरपालिकाको उपमेयरका प्रत्यासी गिता अमात्य, तरुण दल वडा नम्बर १३ का अध्यक्ष रामचन्द्र लामा र ३ जना प्रहरी घाइते भएका थिए ।

नगरपालिकामा भएको तोडफोडबाट एक लाख रुपैयाँ बराबरको क्षति भएको नगरपालिकाले जानकारी दिएको छ ।