मैथली खोल्सा सडकखण्ड अस्थायी रुपमा पुनः सुचारु

नुवाकोट । शुक्रवार राती परेको वर्षाको कारण अवरुद्ध बनेको मैथली खोल्सा सडकखण्ड अस्थायी रुपमा पुन सुचारु भएको छ ।

मैथली तालिम केन्द्रको विदुर तर्फको खोलाको पुलमा १३ गते राती पुगेको क्षति मर्मत गरेर आंशिक रुपमा सुचारु भएकोमा शुक्रबार रातीको पानीले पुनः क्षति पुराएसगै सवारी आवागमन अबरुद्ध भएको थियो ।

गएको बुधबार राती ८ बजेदेखि पूर्ण रुपमा ठप्प भएको सडक माटो भरेर बिहीबार बिहानदेखि सञ्चालनमा ल्याइएपनि शुक्रबार रातीको अविरल वर्षाले बगाएसगैँ पुनः सडक अबरुद्ध बनेको हो ।

पुलको जगमा नै क्षति पुगेर सडक अबरुद्ध हुदाँ विदुरबाट मैथली ब्यारेक हुदै बट्टार आउजाउ गर्न बन्द भएको सडक तत्कालको लागी आशिंक रुपमा ‘गल्छी–त्रिशूली–मैलुङ–स्याफ्रुबेसी–रसुवागढी’ योजनाले खुलाइदिएको हो । उत्त स्थानमा ह्युम पाइप राखेर थप व्यवस्थित बनाएर हल्का सवारीसाधन संचालनको व्यवस्था मिलाइएको ‘गल्छी–त्रिशूली–मैलुङ–स्याफ्रुबेसी–रसुवागढी’ आयोजनाको प्रमुख नारायणदत्त भण्डारीले जानकारी दिए ।

बाढीले ह्युम पाइप बगाएपछि अवरुद्ध सडक झन्डै २२ घण्टापछि खुलेको हो । सडकमा तत्कालका लागि मोटरसाईकल र हलुका सवारी साधन संचालन गर्न सकिने भएको छ । हेवी गाडीहरु भने संचालन गर्न दिइएको छैन ।