पर्सामा चट्याङले तीन जनाको मृत्यु, चार घाइते

नुवाकोट । पर्सामा मंगलबार बिहानै चट्याङ लागेर एक महिलासहित तीन जनाको मृत्यु भएको छ भने चार जना घाइते भएका छन् ।

बिहानै भैंसी चराउन गएका पर्साको सखुवाप्रसौनी गाउँपालिका–४ का ५५ वर्षीय रघुवीर यादवको चट्याङ लागेर घटनास्थलमै मृत्यु भएको हो ।

यस्तै पटेर्वासुगौली गाउँपालिका वडा नम्बर १ गदियानीका २७ वर्षीय रुस्लान गदीको पनि भैंसी चराउन गएका बेला चट्यााङ लागेर घटनास्थलमै मृत्यु भएको छ । उनीसँगै भैंसी चराउन गएका राजबली गदी चट्याङ लागेर गम्भीर घाइते भएका छन् ।

घाइते राजबलीलाई उपचारका लागि वीरगन्जस्थित नारायणी अस्पतालमा पठाइएको इलाका प्रहरी कार्यालय पटेर्वासुगौलीका प्रहरी निरीक्षक रामकाजी थापाले जानकारी दिनुभयो ।

यस्तै खेतमा धान रोप्न गएका बेला चट्याङ लागेर पर्साकै जीराभवानी गाउँपालिका वडा नम्बर ३ जितपुरकी ५० वर्षीया असतुरनी देवी थरूनीको पनि मृत्यु भएको छ ।

गाँउकै रामसोगारत महतोको खेतमा मंगलबार बिहान धान रोप्न गएका बेला चट्याङ लागेर थरूनीको घटनास्थलमै मृत्यु भएको इलाका प्रहरी कार्यालय सेढवाका प्रहरी नायव निरीक्षक राजुबाबु यादवले जानकारी दिनुभयो ।

जीराभवानी गाँउपालिकामै चट्याङ लागेर तीन जना सामान्य घाइते भएको र उनीहरूको स्थानीय स्वास्थ्य संस्थामा उपचार गरिएको पर्साका प्रहरी प्रवक्ता प्रहरी नायव उपरीक्षक ओम प्रकाश खनालले जानकारी दिनुभयो ।