गेर्खुमा कोरोना संक्रमित बढ्दै

नुवाकोट । नुवाकोटको विदुर नगरपालिका वडा नम्बर ११ गेर्खुमा कोरोना संक्रमित बढ्दै गएका छन् ।

सोमवार वडामा २४ जनाको पिसिआर परिक्षण गर्दा २३ जनामा कोरोना संक्रमण पुष्टि भएको विदुर नगरपालिकाका जनस्वास्थ्य निरिक्षक तथा कोभिड १९ फोकल पर्सन रामराजा भण्डारीले जानकारी दिए ।

यस्तै ४ जनाको एन्टिजेन परिक्षण गर्दा दुई जनामा पोजेटिभ देखिएको उनले बताए ।

यससँगै गेर्खुमा कोरोना संक्रमितको संख्या ३० पुगेको छ । संक्रमितमध्ये २ जना अस्पतालको आइसोलेसनमा र बाँकी होम आइसोलेसनमा उपचार गरिरहेको स्वास्थ्य कार्यालय नुवाकोटले जनाएको छ ।

सरकारले काठमाण्डौ उपत्यकामा कोरोना संक्रमण बढेसँगै आह्वान गरेको निषेधाज्ञा अघि काठमाण्डौ छाडेर नुवाकोट घर फर्कनेहरुको लर्काे लागेको थियो ।

तर सर्वसाधारणले सुरक्षा सर्तकता नअपनाउँदा गेर्खुमा कोरोनाले भयावह रुप लिएको एक स्थानिय बताउँछन् । गेर्खुमा जुवातास र जाँडरक्सी खानकै लागि पसलमा जम्मा भएकाहरुको कारण कोरोना फैलने चिन्ता रहेको स्थानिय कालिका माविका एक शिक्षकले बताए ।

यस्तै वडाध्यक्ष तोयानाथ तिम्सिनाले पनि सबैलाई भिडभाड नगर्न र सुरक्षा सर्तकता अपनाउन आग्रह गरेको बताएका छन् । वडामा ३० जनाभन्दा बढी संक्रमित देखिएसँगै वडा शिल गर्ने तयारी गरेको उनले बताए ।