कोरोना भाइरसबारे सचेतना अपनाउन वडाध्यक्ष तिम्सीनाको आग्रह

गेर्खु । कोरोना भाइरसको प्रभाव बढ्दै गएकाले त्यसबाट सजगता अपनाउन विदुर नगरपालिका वडा नम्बर ११ का गेर्खुका वडाध्यक्ष तोयानाथ तिम्सीनाले सम्पुर्ण वडाबासीमा आग्रह गरेका छन् ।

बुधवार विदुरखबरसँग कुराकानी गर्दे वडाध्यक्ष तिम्सीनाले वडा क्षेत्रभित्र भीडभाड हुने खालका कुनैपनि कार्यक्रम गर्न नगराउन सबै वडाबासीलाई आग्रह गरेका हुन् । वडाध्यक्ष तिम्सीनाले नेपाली महिलाहरुको महान चाड हरितालिका तिज नजिकिएसँगै जिल्लामा दिनानुदिन कोरोना संक्रमितहरुको संख्या बढिरहेको भन्दै सचेत अपनाउन आग्रह गरेका छन् ।

वडाध्यक्ष तिम्सीनाले कोरोना भाईरसको संक्रमण नगरपालिकाको विभिन्न स्थानमा फैलिएको र जिल्लामा ७० जना कोरोना भाइरसको संक्रमित भेटिएकोल सचेत अपनाउन सबैलाई आग्रह गरेका हुन् । उनले गेर्खु पनि कोरोनाको उच्च जोखिममा रहेकाले उक्त भाइरसको संभावित संक्रमणबाट जोगिन मेला, महोत्सव, सार्वजनिक कार्यक्रम नगर्न र नगराउन आग्रह गरेका हुन् ।

वडाध्यक्ष तिमिल्सेनाले आफ्नो स्वास्थ्यबारे नियमित ख्याल राख्न, ब्यक्तिगत सरसफाईमा ध्यान दिन, भिडभाड भएको ठाउँमा नजान, मास्कको प्रयोग गर्न, समान्य स्वास्थ्य समस्या देखिएमा चेकजाँच गर्न पनि सबैलाई आग्रह गरेका छन् । ज्वारो आउने, स्वास प्रश्वासमा समस्या हुने, खोकी लाग्ने, जिउ दुख्ने जस्ता लक्षण देखिएमा हेलचेक्राई नगर्न उनले सुझाब दिएका छन् । उनले सार्वजनिक स्थलमा भेटघाट, जमघट, सभा सम्मेलन, मेला पर्व जस्ता कुनैपनि कार्यक्रम नगर्न र त्यस्ता कार्यक्रममा सहभागी नहुन समेत सबैमा अनुरोध गरेका छन् ।

स्वास्थ्य कार्यालय नुवाकोटका अनुसार हालसम्म नुवाकोटमा ७० जना कोरोना संक्रमित भेटिएका छन भने ५४ जना निको भएर घर फर्किसकेका छन् । जिल्ला संकट व्यवस्थापन केन्द्रको मंगलबार बसेको बैठकले जिल्लाभर भदौ २ गतेदेखि नै लागु हुने गरी भदौ ९ गते राति १२ बजेसम्म निषेधाज्ञा जारी गर्ने निर्णय गरिसकेको छ ।