कोरोना प्रभाव: काठमाण्डौमा हुने चेम्बर एक्स्पो स्थगित

नुवाकोट । कोरोना भाइरसको उच्च जोखिममा नेपाल परेको विभिन्न रिपोर्टहरुले दाबी गरेपछि यसको त्रासमा रहेका सर्वसाधारणको स्वास्थ्य जोखिमलाई ध्यानमा राखी नेपाल चेम्बर अफ कमर्सले आयोजना गर्ने चेम्बर एक्स्पो स्थगित गरेको छ ।

आइतबार चेम्बरले एक विज्ञप्ति जारी गर्दै काठमाण्डौको भृकुटीमण्डपमा गर्ने भनिएको एक्स्पो स्थगनको निर्णय भएको प्रष्ट्याएको हो । चेम्बरले त्रिभुवन विमान स्थल तथा अन्य विभिन्न नाकाको आगमन कक्षमा प्रत्येक यात्रुको सघन स्वास्थ परीक्षणको व्यवस्था मिलाउन सरकारसँग माग पनि गरेको छ । चेम्बरले कोरोनाको संभावित प्रकोपबाट बच्न सुरक्षात्मक उपायहरु अपनाउन सबै सरोकारवालालाई आग्रह समेत गरेको छ ।

कोरोना भाइरसको सम्भावित प्रकोप फैलिनसक्ने परिस्थितिका कारण मास्क एवम अति आवश्यक वस्तुहरुलाई सहज एवम सुलभ तरिकाले बिक्रीवितरण गर्न सम्बन्धित सबै सरोकारवालाहरुलाई चेम्बरले आग्रह समेत गरेको छ ।  चेम्बरले कोरोना भाइरसबाट बच्न अति आवश्यक पर्ने उपकरण सामाग्रीहरु जस्तै मास्क लगायतका सामग्रीहरुको आयातमा भन्सार तथा मूल्य अभिवृद्धि कर छुटका लागि समेत नेपाल सरकार समक्ष आग्रह गरेको छ ।

चेम्बरले कोरोना भाइरसबाट हुने जोखिमलाई न्यूनीकरण गर्न निजी क्षेत्रको तर्फबाट  सहजीकरणका लागि चेम्बरका उपाध्यक्ष दिपककुमार मल्होत्राको संयोजकत्वमा कोरोना भाइरस प्रकोप नियन्त्रण  सहजीकरण समिति समेत गठन गरेको छ । समितिमा चेम्बरका कार्य समिति सदस्यमा मृगेन्द्रमेहर श्रेष्ठ, नवराज ढकाल, दिपक श्रेष्ठ, दीपक कुवर, देवेन्द्रभक्त श्रेष्ठ, सुरेन्द्र शारदा, संजय अग्रवाल, त्रिभुवनधर तुलाधर, राजु श्रेष्ठ, अजुन शर्मा सदस्य छन् ।