रसुवाकी एक महिलामा कोरोना भाइरस सङ्क्रमणको आशङ्का

रसुवा । चीनको केरुङबाट फर्किएकी २४ वर्षीया एक महिलामा कोरोना भाइरसको सङ्क्रमण भएको आशङ्का गरिएको छ ।

उपचारका लागि बिहीबार बिहान जिल्ला अस्पताल रसुवा पुगेकी ती महिलामा कोरोना भाइरसको लक्षण देखिएकाले आशङ्का गरिएको अस्पतालले जनाएकाे छ ।  सङ्क्रमण भएको आशङ्कामा आइसुलेसन कक्षमा राखेर उपचार गरिरहेको अस्पतालका मेडिकल सुपरिन्टन्डेन्ट डा‍. अनिलकुमार खरेलले बताउनु भयो ।

‘अहिले हामीले आइसुलेसन कक्षमा राखेर उपचार गरिरहेका छौँ’, उहाँले भन्नुभयो, ‘बिरामीलाई काठमाण्डाै रिफर गर्ने वा स्याम्पल पठाउने भन्ने बारे छलफल भैरहेको छ ।’ ती महिला केरुङबाट गएकाे माघ २ गते नेपाल आएकी थिइन् । अस्पतालमा कोरोनाको आशङ्का गरिएका बिरामी आएमा छुट्टै कक्षमा राखेर उपचार गर्ने व्यवस्था गरिएको छ ।