लिखु गाउँपालिकाको वडा १ मा वृहत सरसफाई कार्यक्रम शुरु

ढिकुरे । नुवाकोटको लिखु गाउँपालिका वडा नम्बर १ मा वृहत सरसफाई कार्यक्रम शुरु गरिएको छ ।

वडा स्तरीय खानेपानी, सरसफाई तथा स्वच्छता समन्वय समिति वडा नम्बर १ को आयोजना तथा लिखु गाउँपालिका र युएन ह्याबिट्याटकको सहयोग तथा डिकोन नेपाल र डिभाईन यूथ क्लवको सहजीकरणमा सरसफाई कार्यक्रम शनिबारबाट शुरु भएको हो । लिखुलाई नमुना बस्तीको रुपमा विकास गर्न कार्यक्रम संचालन गरिएको गाउँपालिकाका उपाध्यक्ष रोजिना राईले जानकारी दिए । लिखुको फोहोर ब्यवस्थापन गर्न डम्पीङ साईटको लागी जग्गा ब्यवस्थापनमा लिखु गाउपालिका लागि परेको उपाध्यक्ष राईले बताए ।

त्यस्तै लिखु गाउपालिका वडा नं १ का वडाअध्यक्ष नरहरी पाण्डेले र वडा नं ३ का वडाअध्यक्ष भोलाप्रसाद र सेडाईले आफ्नो घर वरपरको सरसफाई अरुले एकदिन गरेर नहुने भन्दै लिखुलाई नमुना बनाउनको लागी सबै एकजुट भए। लाग्नुपर्ने बताए । लिखुको मुहार परिबर्तन गर्नको लागी अरुको मुख ताक्न नहुने वडाध्यक्षद्धयले उल्लेख गरे । यस्तै लिखु गाउँपालिकाका स्वास्थ संयोजक भिम रोक्काले स्वास्थ्य र सरसफाई नङ र मासुजस्तै एक अर्कामा सम्बन्धित रहेकोले गाउँपालिकाको विभिन्न स्थानमा सरसफाई कार्यक्रम शुरु गरिएको बताए । उनले गाउँपालिकाको सरसफाईको लागि विभिन्न शैक्षिक, सामाजिक संघसंस्था एकजुट भएर लाग्नुपर्ने बताए ।

लिखु १ मा सरसफाई सुरुवात भएको र यसलाई साप्ताहिक कार्यक्रमको रुपमा अगडी बढाउने डिभाईन यूथ क्लवका अध्यक्ष लक्ष्मण लामिछानेले जानकारी दिए । कार्यक्रममा सरकारी कार्यालयका प्रमुखहरु, ढिकुरे प्रहरी चौकीका प्रहरी, वडा स्वास्थ्य स्वयसेविकाहरुको उपस्थिति रहेको थियो ।