प्रदेश ३ को नाम तोक्दा केन्द्रीयता लादेको भन्दै विरोध

हेटौंडा । नेपाल कम्युनिस्ट पार्टी (नेकपा) प्रदेश ३ को संसदीय दलमा नेताहरुले प्रदेशको नाम र राजधानी पार्टी सचिवालयले तोकेकोमा विरोध गरेका छन् ।

शुक्रबारबाट सूरु भएको बैठकमा सांसदहरुले प्रदेशसभाबाट टुङ्ग्याउनुुपर्ने बिषयलाई पार्टी सचिवालयले गरेर केन्द्रीयता लादेको बताए । प्रदेशको नाम र राजधानीबारे तल्लो तहमा छलफल नै नगरी पार्टीले निर्णय गरेको उनीहरुको गुनासो छ ।प्रदेशको राजधानी हेटौंडा भुगोलको हिसाबले अपायक ठाउँ भएको समेत कतिपयले बताएका छन् ।

मकवानपरुका साथै काठमाडौ र सिन्धुलीका केही ससदले भने हेटौंडालाई नै राजधानी कायम गर्न जोड दिएका छन् । अस्थायी रुपमा कायम भएको भएपनि धेरै संरचना निर्माण भएकाले हेटौंडाको विकल्प खोज्न नहुनेमा उनीहरुको जोड थियो ।सांसदहरुको विरोधका बाबजुद प्रदेशको नाम र राजधानीबारे संसदीय दलले पार्टीको निर्देशनविपरित जाने अवस्था नभएको समेत एक नेताले बताए । उनले भने-‘धेरैको असन्तुष्टि भुगोल भन्दा पनि संविधानअनुसार विधि र प्रक्रिया भएन भन्ने मात्र हो । तर सचिवालयको निर्णयलाई मान्नुको विकल्प छैन ।’

पहिलो दिन २३ जनाले बोलेको र बैठक भोलिसम्म चल्ने मुख्य सचेतक रामेश्वर फुयालले जानकारी दिए ।