संरक्षणको पर्खाइमा देविघाटमा रहेको पृथ्वी नारायण शाहको शालिक

देविघाट । नुवाकोटको विदुर नगरपालिका वडा नम्बर ५ देवीघाटमा रहेको पृथ्वीनारायण शाहको शालिक संरक्षणको पर्खाइमा बसेको छ ।

राजा पृथ्वीनारायण शाहले साना राज्य एकीकरण गरेपछि अन्तिम समय १८३१ माघ १ गते यही शालिक रहेको ठूलो ढुंगामा देहत्याग गरेको इतिहास छ । पछि सोही ढुंगामा पश्चिम मोहडा फर्किएको शालिक निर्माण राखिएको थियो । स्मारकमा यहाँ आउने स्वदेशी तथा विदेशीले पर्यटकले शालिकमै गएर फोटो खिच्ने गरेका छन । स्मारक वरिपरि लगाइएको पर्खाल होचो छ ।

चारैतिर ढोका भएपनि ढोकाले राम्रोसँग काम नगरेको विदुर नगरपालिका वडा नम्बर ५ का हरि कुमालले बताए । शालिकमा जो कोहीको पनि पहँच पुगेपछि शालिक अहिले संकटमा परेको छ । यसअघि शालिकको राम्रोसँग हेरचाह नगरेकै कारण गतवर्ष शालिकमा रहेको तरबार हराएको थियो । तरबार हराएपछि शालिकमा अहिले नक्कली तरवार जडान गरिएको छ ।