‘टान’ निर्वाचनः अध्यक्षमा सुवेदी र थापा भिड्दै

नुवाकोट ।  पदयात्रा पर्यटन व्यवसायीको छाता सङ्गठन ट्रेकिङ एजेन्सीज एसोसिएसन अफ नेपाल (टान) को अध्यक्षमा प्रजातान्त्रिक समूहबाट खुमबहादुर सुवेदी र वामपन्थी समूहबाट अन्जन थापा भिड्ने भएका छन् ।

प्रजातान्त्रिक समूह निकट रहेको निट नेपालको शनिबार बसेको बैठकले प्रजातान्त्रिक व्यवसायीको तर्फबाट हालका वरिष्ठ उपाध्यक्ष सुवेदीको नेतृत्वमा व्यवसायी समूह उठाउने निर्णय गरेको हो । सुवेदीको नेतृत्वमा वरिष्ठ उपाध्यक्षमा नविन त्रिताल, प्रथम उपाध्यक्षमा चोलेन्द्रबहादुर कार्की, द्वितीय उपाध्यक्षमा भरत सापकोटा, महासचिवमा कर्मा शेर्पा, कोषाध्यक्षमा रितु ग्याम्दान, सचिवमा प्रदीप घिमिरे र सह–कोषाध्यक्षमा सूर्यकुमार श्रेष्ठलाई उठाउने निर्णय गरिएको निट नेपालका अध्यक्ष दीपक महतले जानकारी दिनुभयो ।

त्यस्तै वामपन्थी पर्यटन व्यवसायीको तर्फबाट अन्जन थापालाई अध्यक्ष बनाउने भएको छ । थापा समूहबाट लड्ने पदाधिकारी तथा सदस्यको नाम टुङ्ग्याउन बाँकी रहेको जनाइएको छ ।

टानको वार्षिक साधारणसभा तथा निर्वाचन भदौ २० गते हुँदैछ । पर्यटन क्षेत्रको सबैभन्दा धेरै सदस्य रहेको टानमा दुई हजारभन्दा बढी साधारण सदस्यले निर्वाचनमा भाग लिन पाउनेछन् ।