पाँचौ एनयुएफसी अन्तर जिल्लास्तरीय फुटसल प्रतियोगिता सुरु

नुवाकोट । नुवाकोटको विदुर ४ बट्टारमा शनिवारदेखि ५ औँ एनयुएफसी छात्र तथा छात्रा अन्तर जिल्लास्तरीय फुटसल प्रतियोगिता सुरु भएको छ।

नुवाकोट युनाइटेड फुटबल क्लबको आयोजनामा सुरु भएको सो प्रतियोगिताको उद्घाटन विदुर नगरपालिकाका नगरप्रमुख राजन श्रेष्ठले गरेका हुन्।

स्वास्थ्य र खेलकुद विकासलाई प्रवर्धन गर्ने उद्देश्यले आयोजित यस प्रतियोगितामा नुवाकोट जिल्लाका ३९ वटा विद्यालयहरूले सहभागिता जनाएका छन्। प्रतियोगितामा छात्रतर्फ ४९ र छात्रातर्फ ९ गरी कुल ५८ वटा टिम प्रतिस्पर्धामा उत्रिएका छन्।

लिग-कम-नकआउटका आधारमा सञ्चालन भइरहेको यो खेल आगामी बुधबारसम्म चल्नेछ। प्रतियोगितामा प्रथम तथा द्वितीय हुने टोलीहरूले नगद पुरस्कारसहित ट्रफी, मेडल र प्रमाणपत्र प्राप्त गर्ने आयोजक नुवाकोट युनाइटेड फुटबल क्लबले जनाएको छ।