नुवाकोटमा यू–१४ फुटबल प्रतियोगिता सुरु हुँदै

नुवाकोट । नुवाकोट जिल्ला फुटवल संघको आयोजनामा आगामी शुक्रवार (कार्तिक २१ ) देखि यू–१४ छात्र/छात्रा अन्तरविद्यालय फुटबल प्रतियोगिता हुने भएको छ ।

स्वर्गीय खेलाडीहरु अनुपम घलान,आदित्य बलम्पाखी, विकल रेग्मी, दिवस बाँनियाँ, प्रियान्स आचार्य र साईमन योन्जनको स्मृतिमा हुन लागेको प्रतियोगिता कार्तिक २१ गतेदखि मंसिर २ गतेसम्म संचालन हुनेछ ।

प्रतियोगितामा नुवाकोट जिल्लाका संस्थागत र सामुदायिक विद्यालयका छात्रा र छात्र गरि २० टिमको सहभागिता रहने नुवाकोट जिल्ला फुटवल संघका अध्यक्ष देवनारायण चित्रकारले जानकारी दिए । उनले फुटबललाई बलियो बनाउने आधार नै ग्रासरुट रहेको ले प्रतियोगिता गर्न लागेको उल्लेख गरे । जुनियर फुटबल प्रतियोगिताले नयाँ प्रतिभावान खेलाडी उत्पादन गर्न सहयोग गर्छ । नव प्रतिभावान खेलाडीहरुको लागि यो प्रतियोगिता आयोजना गरेका हौं, चित्रकारले भने ।

प्रतियोगिता नुवाकोट आर्दश बहुमुखी क्याम्पसको खेल मैदान बट्टारमा हुने नुवाकोट जिल्ला फुटवल संघका उपाध्यक्ष अच्युत गिरीले बताए । उनले विद्यालय स्तरबाट नयाँ प्रतिभावान खेलाडी उत्पादन गर्ने उद्देश्यले प्रतियोगिता आयोजना गर्न लागिएको बताए ।

प्रतियोगिता लिग कम नकआउटका आधारमा संचालन गरिने नुवाकोट जिल्ला फुटवल संघका महासचिव विष्णु चालिसेले जानकारी दिए । प्रतियोगिताको उद्घाटन अखिल नेपाल फुटवल संघका अध्यक्ष पंकज विक्रम नेम्वाङ, उपाध्यक्ष दिपक खतिवडा र विदुर नगरपालिकाका मेयर राजन श्रेष्ठ लगायतले गर्ने बताइएको छ ।

प्रतियोगिताको उद्घाटन अघि नुवाकोट फुटवल संघमा आवद्ध विभिन्न ३३ ओटा विद्यालयहरुलाई वल वितरण गर्ने कार्यक्रम समेत राखिएको नुवाकोट जिल्ला फुटवल संघका अध्यक्ष चित्रकारले बताए ।

प्रतियोगिताको विजेता र उपविजेताका साथै उत्कृष्ट खेलाडीहरुले ट्रफी मेडल र प्रमाणपत्र प्राप्त गर्ने आयोजकले जनाएको छ ।

प्रतियोगिताको ड्र सार्वजनिक
यसैविच आगामी शुक्रवारदेखि शुरु हुने प्रतियोगिताको ड्र सार्वजनिक गरिएको छ । नुवाकोट जिल्ला फुटवल संघले प्रतियोगिताको ड्र सार्वजनिक गरेको हो ।

प्रतियोगितामा छात्रातर्फ दानसिंङ मावि,अर्किड एकेडेमी,जेडी बोर्डिङ र चन्द्रज्योती माविले सहभागिता जनाएका छन् ।छात्रतर्फ सहभागि भएका १६ विद्यालयलाई चार समुहमा विभाजन गरिएको छ ।

समुह ए मा तीनधारे मावि, त्रिशुली सामुदायिक बोर्डिङ स्कुल, संस्कृत मावि र रणभुवनेश्री मावि रहेका छन् । त्यस्तै समुह बि मा जेडी बोर्डिङ, त्रिभुवन त्रिशुली मावि, स्पार्कल ईन्टरनेशनल र चन्द्रज्योती मावि रहेका छन् ।

त्यस्तै समुह सि मा सुभेनियर बोर्डिङ स्कुल, अर्किड एकेडेमी, दानसिङ मावि र च्वाडी पब्लिक मावि रहेका छन् । यस्तै समुह डि मा महेन्द्र मावि, महादेव मावि, शिलादेवी मावि र गणेश भ्यु बाटिका रहेका छन् ।

प्रतियोगिताको उद्घाटन खेल तीनधारे पिपलडाँडा मावि र त्रिशुली सामुदायिक बोर्डिङ स्कुलबीच प्रतिष्पर्धा हुने छ ।

प्रतियोगिताको उद्घाटनको दिन वाहेक लिग चरणकको खेलमा हरेक दिन चार खेल हुने छन् । प्रतियोगिताको फाईनल खेल आमामी मंसिर २ गते हुनेछ ।