शुभ–प्रभात बचत तथा ऋण सहकारीको १६ औ वार्षिक साधारणसभा सम्पन्न

नुवाकोट । विदुर नगरपालिका वडा नम्बर २ ईन्द्रचोकमा रहेको शुभ–प्रभात बचत तथा ऋण सहकारी संस्था लिमिटेडको १६ औ वार्षिक साधारणसभा शनिवार सम्पन्न भएको छ ।

साधारणसभामा सहकारीको वार्षिक प्रगति प्रतिवेदन प्रस्तुत अध्यक्ष महेन्द्रलाल श्रेष्ठले आर्थिक वर्ष २०८९÷८० मा सहकारीले सम्पुर्ण खर्च कटाई २५ लाख ७१ हजार ७ सय ४४ रुपैँया नाफा गरेको बताए ।

उनले हाल सहकारीमा ३ करोड २५ लाख ४६ हजार ४ सय ६६ रुपैयाँ मौज्दात रहेकोले लगानी योग्य पूंजीको अभाव नरहेको बताए । उनले सहकारीको आफ्नै भवन निर्माण भइरहेको भन्दै यसै आर्थिक वर्षबाट सहकारीले भवनबाट सेवा प्रवाह गर्ने जानकारी दिए ।

त्यस्तै सहकारीका कोषाध्यक्ष रामराजा श्रेष्ठले सहकारीको आर्थिक प्रतिवेदन तथा आर्थिक वर्ष २०८०÷८१ को अनुमानित आय व्यय प्रस्तुत गर्दे देशको अर्थतन्त्र धराशायी अवस्थामा पुगेकोले सहकारीले कृषि तथा अन्य उत्पादन क्षेत्रमा प्राथमिकता दिएको बताए ।

उनले सहकारीमा तरलताको अभाव हुन नदिन बचत संकलन अभियानलाई तिव्रता दिएको बताए । यस्तै शेयर पूँजी कम भएकोले यसै वर्ष सदस्यहरु बृद्धि गर्ने समेत उल्लेख गरे । सहकारीले आर्थिक वर्ष २०८०÷८१ मा २७ करोड ६६ लाख ३८ हजार रुयैयाँ आम्दानी गर्ने लक्ष्य लिएको छ ।

साधारणसभामा बोल्दै नुवाकोट बचत तथा ऋण सहकारी संस्था लिमिटेडका अध्यक्ष नारायण श्रेष्ठले जिल्लामा रहेका अन्य सहकारीहरुमध्ये शुभ–प्रभात बचत तथा ऋृण सहकारी संस्था लिमिटेडको वित्तिय सुचक राम्रो रहेको बताए ।

उनले सहकारीले आफ्नो शेयर सदस्यहरुको आर्थिक सामाजिक रुपान्तरण र हितको लागि सहकारीले अहम भुमिका खेलेको बताए । उनले शुभप्रभात सहकारी जिल्लाको उत्कृष्ट १० सहकारीभित्र रहेको भन्दै खुशी व्यक्त गरे ।