सवारी दुर्घटनामा सुर्यगढीका अधिकारीको मृत्यु

नुवाकोट । मोटरसाईकलले ढक्कर दिँदा नुवाकोटको सुर्यगढी गाउँपालिकाका एक जनाको मृत्यु भएको छ ।

मृत्यु हुनेमा सुर्यगढी गाउँपालिका वडा नम्बर ५ फेदीबेंसीका राजसागर अधिकारी रहेको प्रहरीले जनाएको छ । काठमाडौंकोे चपलीमा आईतवार राती भएको दुर्घटनामा अन्य ३ जना समेत घाइते भएका छन् ।

महाराजगन्ज चक्रपथबाट बुढानीलकण्ठतर्फ जाँदै गरेको बाग्मती प्रदेश ०२ ०४४ प ०५१३ स्कुटीलाई विपरीत दिशाबाट तीव्र गतिमा आएको बा ९५ प २६०७ मोटरसाइकलले ठक्कर दिँदा अधिकारीको मृत्यु भएको हो । अधिकारी राष्ट्रिय वाणिज्य बैंक एयरपोर्ट शाखामा कार्यरत थिए । उनी नेपालटार बस्दै आएका थिए ।

मोटरसाइकलको ठक्करबाट सख्त घाइते अधिकारीलाई त्रिवि शिक्षण अस्पताल महाराजगन्ज मृत्यु भएको महानगरीय प्रहरी प्रभाग बुढानीलकण्ठले जानकारी दिएको छ । स्कुटीको पछाडि सवार अधिकारीका साथी घाइते निश्चल दाहालको मोडल अस्पताल बागबजारमा उपचार भइरहेको छ ।

यसैबीच, मृतक अधिकारीका परिवारले मोटरसाइकल चालक ओजस थापाविरुद्ध प्रहरी वृत्त महाराजगन्जमा जाहेरी दर्ता गरेका छन् ।

तीव्र गतिमा मोटरसाइकल चलाएर स्कुटीलाई ठक्कर दिँदा दुर्घटना भएको र अधिकारीको ज्यान गएको किटानीसहित परिवारले जाहेरी दर्ता गराएको नेकपा (माओवादी केन्द्र) सूर्यगढी गाउँ संगठन समितिका सचिव पुरुषोत्तम अधिकारीले बताए ।
जाहेरीमा दोषीलाई हदैसम्मको कारबाही हुनुपर्ने माग गरिएको छ ।