नुवाकोटको चार स्थानमा यात्रु सहायता कक्ष स्थापना

नुवाकोट । दसैँ तिहारमा यात्रुहरूको सहयोगका लागि भन्दै जिल्ला ट्राफिक प्रहरी कार्यालय नुवाकोटले जिल्लाका विभिन्न चार स्थानमा यात्रु सहायता कक्ष स्थापना गरेको छ ।

दसैँ तिहारसँगै छठ पर्वको अवसरमा हुने भिडभाडलाई मध्यनजर गर्दै ट्राफिक प्रहरीले जिल्लाको सदरमुकामसहित चार स्थानमा यात्रु सहायता कक्ष स्थापना गरेको हो ।

प्रहरीले बढी भिडभाड हुने विदुर नगरपालिकाको वडा नम्बर १ ढुङ्गे, बट्टार वसपार्क, ढिकुरे र खरानीटारमा यात्रु सहायता कक्षा स्थापना गरि संचालनमा ल्याएको हो ।

जिल्लाको मुख्य व्यापारिक केन्द्र लगायतका बजार क्षेत्रमा यात्रु सहायता कक्ष स्थापना गरिएको जिल्ला ट्राफिक प्रहरी कार्यालय नुवाकोटका प्रमुख राजीव तिवारीले जानकारी दिए । सवारी साधनले बढी भाडा लिने, गाडीमा क्षमताभन्दा बढी यात्रु राख्ने, यात्रुमाथि हुने अभद्र व्यवहारजस्ता गतिविधि नियन्त्रण गर्न यात्रु सहायता कक्ष स्थापना गरिएको तिवारीले बताए ।

उनले यात्रुहरूको कुनै गुनासो भएमा जिल्ला ट्राफिक प्रहरी कार्यालय वा नजिकको प्रहरी कार्यालयमा सम्पर्क गर्न समेत आग्रह गरे ।