विदुर नगरपालिकाको डेंगु रोकथाम र नियन्त्रणका लागि विशेष अभियान शुरु

नुवाकोट । नुवाकोटको विदुर नगरपालिकाले नगरपालिका भित्र डेंगु रोकथाम र नियन्त्रणका लागि विशेष अभियान शुरु गरेको छ ।

नगरपालिकाले मंगलवार एक कार्यक्रमको आयोजना गरि डेंगु रोकथाम र नियन्त्रणका लागि विशेष अभियान शुरु गरेको हो ।
विदुर नगरपालिकाको विशेष गरि वडा नम्बर १, २, ४, ६ को बजार क्षेत्रमा डेंगु रोगका संक्रमितहरुको संख्या बढेसँगै नगरपालिकाले ‘खोज र नष्ट’ अभियान शुरु गरेको नगरपालिकाका मेयर राजन श्रेष्ठले जानकारी दिए ।

मेयर श्रेष्ठले डेंगु रोकथामको लागि नगरपालिका आवश्यक सबै उपायहरु अवलम्बन गर्न तयार रहेको बताउँदै यो अभियानलाई सार्थक बनाउन सबै पक्षको ऐक्यबद्धता आवश्यक रहेको बताउँछन् ।

नुवाकोटमा अहिलेसम्म ८२ जना डेंगु संक्रमित भेटिएका छन् । भेटिएका संक्रमितमध्ये ४५ जना विदुर नगरपालिकाका र अन्य स्थानीय तहमा रहेका छन् । भेटिएका संक्रमितमध्ये सोमवारसम्म मात्रै १७ जना नयाँ विरामी भेटिएका हुन् ।

नगरपालिकाले नगरको १३ वट्टै वडामा विशेष अभियान संचालन गरेर डेंगु रोकथाम र नियन्त्रणका लागि साताव्यापी रुपमा कार्यक्रम गर्ने जनाएको छ ।

नगरपालिकालाई साथ दिन अन्य स्थानिय तहले समेत समन्वय गरेर कार्यक्रम सचालन गर्ने बताएका छन् ।