गाउँपालिकाको काम छिटो र प्रभावकारी बनाउन अध्यक्ष अधिकारीको निर्देशन

नुवाकोट । नुवाकोटको तारकेश्वर गाउँपालिका अध्यक्ष शिव अधिकारीले पालिकाको काम छिटो र प्रभावकारी बनाउन निर्देशन दिएका छन् ।

आईतवार विभिन्न शाखा प्रमुख तथा कर्मचारीहरुसँगको छलफलमा अधिकारीले जनप्रीय काम गर्न निर्देशन दिएका हुन् । छलफल कार्यक्रममा उनले चालू आर्थिक बर्षको बजेट निर्माणमा रचनात्मक सल्लाह, सुझाव र सहयोग प्रदान गर्ने सबैलाई धन्यवाद दिदै त्यसको प्रभावकारी कार्यान्वयन र जनताको कामलाई सहज, छिटो एवम् प्रभावकारी बनाउने गरि काम गर्न निर्देशन समेत दिए ।

अध्यक्ष अधिकारीले आम नागरिकले पालिकाले प्रदान गर्ने सेवामा ढिलासुस्ती भएको गुनासो आउन नदिन र अत्यावश्यक नभइ बिदामा समेत नबस्न कर्मचारीहरुलाई निर्देशन दिए ।

अत्यावश्यक भएर बिदामा बस्नुपरेमा काममा बाधा नपर्ने गरि अनिवार्य स्वीकृत गराउन समेत उनले कर्मचारीहरुलाई निर्देशन दिएका छन् ।

उनले कर्मचारीहरुको कामको पालिकाले सुस्म निगरानी गर्ने तथा गुण र दोषको आधारमा सम्मान र कारबाहीको व्यवस्था गरिने समेत उनले जानकारी दिए ।

छलफल कार्यक्रममा विभिन्न शाखाका शाखा प्रमुखहरुले आफ्नो मातहतमा रहेका कार्यालयको वारेमा ब्रिफिङ गरेका थिए ।