विदुर खानेपानी उपभोक्ता समितिको नेतृत्व हत्याउन डंगोल र श्रेष्ठ मैदानमा

नवाकोट । विदुर खानेपानी तथा सरसफाई उपभोक्ता संस्था लिमिटेडको आठौ अधिवेशनमा नेतृत्व हत्याउन नेपाली काग्रेस र एमाले दुबैले कम्मकर कसेर लागेका छन् ।

आगामी सोमवार हुने समितिको अधिवेशनमा आफ्ना प्रतिनिधिलाई जिताउन कांग्रेस र एमाले दुबै दल गठबन्धन गरेर निर्वाचनमा होमिएका हुन् ।

कांग्रेसको नेतृत्वमा नेकपा माओवादी केन्द्र र नेकपा समाजवादी पार्टी एकातर्फ उभिएका छन् भने अर्काेतर्फ नेकपा एमाले र रााष्ट्रिय प्रजातन्त्र पार्टीले गठबन्धन गरेका छन् ।

कांग्रेस नेतृत्वको गठबन्धनले अध्यक्षमा छत्रराज डगोललाई अघि सार्दा एमालेले संञ्जीव श्रेष्ठलाई अगाडी सारेको छ । यस्तै उपाध्यक्षमा गठबन्धन दलको तर्फबाट नमराज न्यौपानेले उम्मेद्धवारी दिँदा राप्रपाका महेशकुमार डंगोल र मुरारी नेपालले स्वतन्त्र उम्मेद्धवारी दिएका छन् ।

कोषाध्यक्षमा गठबन्धन दलको तर्फबाट रविता भट्ट र एमालेको तर्फबाट अम्बिका चित्रकारले उम्मेद्धवारी दिएकी छिन् । सचिवमा गठबन्धन दलकोतर्फबाट नरेशवहादुर डंगोल र एमालेको तर्फबाट राजेन्द्र पाण्डेको उम्मेद्धवारी परेको छ ।

सदस्यमा गठबन्धनको तर्फबाट राजेन्द्र सापकोटा, रामजी भट्ट र पदमकान्त न्यौपानेको उम्मेद्धवारी परेको छ भने एमालेको तर्फबाट कृष्णप्रसाद भट्ट , लवप्रसाद न्यौपाने र दिपकबहादुर तिम्सिनाको उम्मेद्धवारी परेको छ । यस्तै स्वतन्त्रको तर्फबाट दिपक खड्काले उम्मेद्धवारी दिएका छन् ।

झण्डै ४ हजार उपभोत्ता रहेको खानेपानी समितिको निर्वाचनमा ३ हजार एकसय ४१ जनाले मतदान गर्नेछन् ।

विदुर नगरपालिकाको वडा नम्बर १, २, ३, ४, ५, ६ र ९ मा खानेपानी वितरण गरिरहेको विदर खानेपानी तथा सरसफाइ उपभोक्ता संस्थाको अधिवेशनलाई राजनितिक दलले प्रतिष्ठाको विषय बनाएका छन् ।

यसअघि २०७५ सालमा सम्पन्न भएको खानेपानी समितिको अधिवेशनमा नेकपा एमाले र माओवादी केन्द्र मिलेर बनेको तत्कालिन नेकपा प्यानल नै विजयी भएको थियो ।