सूचना विधेयक खारेज गर्न सांसद लामाको माग

विदुर खबर २०७६ असार १८ गते १२:२६

नुवाकोट असार १८,  नेपाली कांग्रेसका सांसद बहादुरसिंह लामाले कम्युनिस्ट सरकारले ल्याएको सूचना प्रविधिको सम्बन्धमा व्यवस्था गर्न बनेको विधेयकमा समावेश गरिएका सामाजिक सञ्जालसम्बन्धि सबै प्रावधान खारेज गर्न माग गरेका छन् ।

Advertisement

संसदको विकास तथा प्रविधि समितिको बुधबारको बैठकमा विधेयकमाथिको छलफलका क्रममा लामाले संविधान प्रतिकूल हुनेगरी आएको सामाजिक सञ्जालसम्बन्धि सबै प्रावधान खारेज गर्न सरकारसँग माग गरेका हुन् । नेपाली कांग्रेसका सांसद लामाले सामाजिक सञ्जालमार्फत् अभिव्यक्ति स्वतन्त्रतालाई प्रतिबन्ध लगाउने गरी आएको सो विधेयक मान्य नहुने चेतावनी दिँदै फरक मत पनि पेश गरेका छन् ।

संविधानको विरुद्धमा हुने गरी सामाजिक सञ्जाल फेसबुक लगायतमाथि प्रतिबन्ध लगाउने गरी आएको सो विधेयकमा सहमति जनाउन नसकिने भएकाले समितिमा आफूले फरक मत पेश गर्नु परेको सांसद लामाको भनाई छ । सांसद लामाले सरकारले नागरिकको अभिव्यक्ति स्वतन्त्रतालाई समेत हनन् हुने गरी संविधान विरोधी सो विधेयक मान्य नहुने चेतावनी पनि दिए । सत्तारुढ नेपाल कम्युनिष्ट पार्टी (नेकपा)का वरिष्ठ नेता झलनाथ खनालले भने सामाजिक सञ्जालको दुरुपयोग हुने गरेको उल्लेख गर्दै त्यसलाई सरकारले नियन्त्रण गरेर जान उपयुक्त हुने धारणा राखेका थिए ।

Advertisement

उनले आफूलाई नसोधी रतन्धो रोगी भएको समाचार सम्प्रेषण गरेको उल्लेख गर्दै यस ढंगले गलत समाचार सम्प्रेषण गर्नेहरुलाई नियन्त्रण गर्न सरकारले कानुन बनाउन आवश्यक रहेको पनि स्पष्ट पारे । पूर्व प्रधानमन्त्री समेत रहेका खनालले सामाजिक सञ्जालको दुरुपयोग हुने क्रममा बढेकाले त्यसलाई नियन्त्रण गर्न आवश्यक रहेको पनि बताए । बैठकमा समितिका सदस्यहरुले विवादमा तानिएको सो विधेयक व्यापक परामर्श गरेर मात्रै पारित गर्नुपर्ने धारणा पनि राखेका थिए ।

प्रतिक्रिया