कर्मचारी अभावले नुवाकोटको १२ वटै स्थानीय तहमा विकास निर्माण ठप्प

नुवाकोट जेठ २,स्थानीय विकासका लागि संविधानले अधिकार सम्पन्न बनाएको स्थानीय तहमा अझै कर्मचारी पुग्न सकेको छैनन् । निर्वाचन भएर पूर्ण रूपमा स्थानीय तह सञ्चालनमा आएको दुई वर्ष पूरा हुँदा समेत स्थानीय तहमा कर्मचारीको अभाव कायमै रहेको छ । कर्मचारी व्यवस्थापनमा समस्या आएपछि नुवाकोटका १२ वटै स्थानीय तहको विकास निर्माणको काम प्रभावित बनेको छ ।

नुवाकोटको स्थानीय तहहरूमा योजना, कृषि, स्वास्थ्य, शिक्षा, महिला विकासलगायतका शाखाहरूमा कर्मचारीको अभाव छ । विकास निर्माणका लागि आवश्यक प्राविधिक कर्मचारीसमेत नहुँदा स्थानीय तहको विकास र योजना अलपत्र अवस्थामा छन । नुवाकोटको विदुर र बेलकोटगढी नगरपालिका तथा शिवपुरी र किस्पाङ गाउँपालिकामा अन्य स्थानीय तहमा भन्दा बढी कर्मचारीको अभाव रहेको छ । विदुर नगरपालिकामा निजामतितर्फ ५८ जना कर्मचारीको दरबन्दी भएपनि ५० जना कर्मचारी रहेको नगरपालिकाको भनाई रहेको छ । नगरपालिकामा प्राविधिकहरुको धेरै अभाव भइरहेको विदुर नगरपालिकाका प्रमुख सञ्जु पण्डितले बारम्बार सार्वजनिक कार्यक्रममा बताउने गरेका छन । दक्ष प्राविधिकहरु नहुँदा नगरपालिकाको कामहरु प्रभावित भएको मेयर पण्डित बताउँछन । त्यस्तै बेलकोटगढी नगरपालिकाका प्रमुख राजेन्द्ररमण खनालले पनि गर्न सार्वजनिक मञ्चैम कर्मचारी अभावमा सोचेजस्तो काम गर्न नसकेको गुनासो गर्न थालेका छन । खनालले गत शुक्रवार बेलकोटगढी नगरपालिका वडा नम्बर ९ को वडा कार्यालयको भवन शिल्यान्यास कार्यक्रममा गाउँपालिकामा कर्मचारी अभावले सोचजस्तो सन्तोषजनक काम गर्न नसकेको बताए । उनले गाउँपालिकामा प्राविधिक स्तरका कर्मचारीको अभावमा समस्या परेको जानकारी दिए ।

नुवाकोटको विदुर र बेलकोटगढी नगरपालिका तथा शिवपुरी र किस्पाङ गाउँपालिकामा अन्य स्थानीय तहमा भन्दा बढी कर्मचारीको अभाव रहेको छ ।

त्यस्तै किस्पाङ गाउँपालिकामा प्रमुख प्रशासकिय अधिकृत वाहेकका कर्मचारी नहुँदा गाउँपालिकाको आर्थिक कामकाज ठप्प भएको गाउँपालिकाका अध्यक्ष छत्र लामाले बताए । उनले गाउँपालिकामा लेखापाल, योजना शाखा र प्रशासन शाखामा कर्मचारी नहुँदा गाउँपालिका पुरै प्रभावित रहेको बताए । कर्मचारी अभावको वारेमा केन्द्र र प्रदेश सरकारलाई जानकारी गराएपनि कर्मचारी तत्कालको अवस्थामा आउन समय लाग्ने बताए । तर किस्पाङ गाउँपालिकामा भने केही प्राविधिक धारका कर्मचारी रहेको उनको भनाई । ६ वटा वडा रहेको यो गाउँपालिकामा ५ वडा सचिव विहीन छन् । कर्मचारी अभावमा एउट्टै सचिवले ६ ओटा वडाको काम गरिरहेको गाउँपालिका लामाले जानकारी दिए । गाउँपालिकाको शिक्षा, महिला विकास शाखामा एक जना पनि कर्मचारी छैनन । यता तादी गाउँपालिकामा गाउँपालिकामा समेत कर्मचारीको अभाव छ । गाउँपालिकामा स्वीकृत दरबन्दी अनुसारका कर्मचारी नभएको गाउँपालिकाले जनाएको छ । पालिकामा प्राविधिक र अधिकृत तहका कर्मचारीको अभाव रहेको छ भने प्राविधिक कर्मचारीको अभाव भएपछि करारमा कर्मचारी भर्ना गरिएको गाउँपालिकाको कार्यालयले बताएको छ ।

यस्तै शिवपुरी गाउँपालिकामा पनि कर्मचारीको चरम अभाव देखिएको छ । ८ ओटा वडा कार्यालय रहेको गाउँपालिकामा २ जना सचिवहरुले वडा संचालन गरिरहेका छन । गाउँपालिकामा प्राविधिक, शिक्षा शाखामा कर्मचारी ठप्पैजस्तो रहेको गाउँपालिकाले जनाएको छ । कर्मचारीको अभावमा योजना कार्यान्वयनमा समस्या रहेको प्रमुख प्रशासकीय अधिकृत किसान न्यौपानेले बताए । गाउँपालिकामा स्थाइ कर्मचारी कोही नभएको प्रमुख प्रशासकीय अधिकृत न्यौपानेले जानकारी दिए । प्रमुख प्रशासकीय अधिकृत न्यौपानेका अनुसार पालिकामा महिला विकास शाखा,न्याय शाखा र स्वास्थ्य शाखामा कर्मचारी अभाव हुँदा काम गर्न समस्या देखिएको छ भने भएका केही कर्मचारी समेत समायोजनको कारणले गर्दा अन्यत्र जान लागेको उनले बताए । प्रत्येक वडामा एक स्वास्थ्य प्राविधि राख्ने निर्णय भएपनि ४ जना करारमा राखिएको न्यौपानेले बताए ।

नयाँ संरचनाअनुसार निर्वाचन भएको दुई वर्ष पुग्दासमेत स्थानीय तहमा कर्मचारीको अभावले सेवा प्रवाहमा समस्या भइरहेको छ भने विकास निर्माणका योजना सञ्चालनमा पनि समस्या भएको सम्बन्धित स्थानीय तहको गुनासो छ । दुई नगरापालिका र १० गाउँपालिका रहेको नुवाकोटमा जनप्रतिनिधिहरुले स्थानिय तहमा कर्मचारी अभावको कारण सन्तोषजनक काम गर्न नसकेको बताइरहँदा आम जनता भने जनप्रतिनिधको काम गर्ने शैली देखेर हैरान हुन थालेका छन ।