रसुवामा एक वृद्धको भिरबाट लडेर मृत्यु

नुवाकाेट । रसुवामा भिर मौरीको मह झिक्न गएका एक वृद्धको भिरबाट लडेर मृत्यु भएको छ।

मृत्यु हुनेमा नौकुण्ड गाउँपालिका–२, युब्राका ६५ वर्षीय नोम्वा नाङमेल नेकोर रहेकाे जिल्ला प्रहरी कार्यालय रसुवाले जानकारी दिएकाे छ ।

मह निकाल्ने क्रममा एक्कासि चिप्लिएर खसेपछि उनकाे घटनास्थलमै ज्यान गएको जिल्ला प्रहरी कार्यालय रसुवाका प्रमुख प्रहरी नायब उपरीक्षक हेमबहादुर शाहीले जानकारी दिए ।

घटना लाङटाङ राष्ट्रिय निकुञ्जको मध्यवर्ती क्षेत्रस्थित बान्द्रो इलाकामा भएको प्रहरीले जनाएको छ। अत्यन्तै जोखिमपूर्ण भिरमा मह संकलन गर्ने क्रममा नेकोर असन्तुलित भई झन्डै सय मिटर तल खसेकाे प्रहरीकाे प्रारम्भिक अनुसन्धानले देखाएको शाहीले बताए ।

घटनाबारे थप अनुसन्धान भइरहेको जिल्ला प्रहरी कार्यालय रसुवाले जनाएको छ।