गोसाईकुण्ड नुहाउन गएका मोरङका दुई युवकको डुबेर मृत्यु

नुवाकोट । पवित्र तीर्थस्थल गोसाइँकुण्डमा स्नानको क्रममा आइतबार डुबेर बेपत्ता भएका दुबैजना मृत अवस्थामा भेटिएका छन् ।

जिल्ला प्रहरी कार्यालय रसुवाका प्रमुख हेमबहादुर शाहीका अनुसार मृत अवस्थामा भेटिनेमा मोरङ जिल्ला विराटनगरका दुई युवक सुजन ढकाल र मोरङ बेलवारीका मनोज न्यौपाने रहेका छन् ।

गहिरो ठाउँबाट स्नान गर्न कुण्डमा पसेका उनीहरु डुबेर बेपत्ता भएका थिए । उनीहरुलाई नेपाली सेनाको श्रीनाथ गणबाट खटिएको उद्दार टोलीले मृत अवस्थामा फेला पारेको हो ।

आईतवार बेपत्ता भएका उनीहरुको खोजीका लागि नेपाली सेना श्रीनाथ गण, नेपाल प्रहरी र सशस्त्र प्रहरी बलका अधिकृत तथा जवानलाई आइतबार नै गोसाइँकुण्ड पठाइएको थियो ।