रसुवामा गुम्बाको भर्याङ भत्किँदा एक महिलाको मृत्यु

रसुवा । कालिका गाउँपालिका–१ ग्राङ बजारमा निर्माणाधीन गुम्बाको भर्याङ भत्किँदा एक महिलाको ज्यान गएको छ भने अर्का एक जना घाइते भएका छन्।

जिल्ला प्रहरी कार्यालय रसुवाका अनुसार मंगलबार अपराह्न ३:३५ बजे गुम्बाको इँटा र सिमेन्टले बनाइएको भर्याङ अचानक भत्किँदा चिर्की तामाङ (४३) को ज्यान गएको हो। उनलाई उपचारका लागि रसुवा अस्पताल लैजाँदै गर्दा बाटोमै मृत्यु भएको प्रहरीले जनाएको छ।

घटना तामाङ समुदायको धार्मिक कर्मकाण्ड ‘घेवा’ तयारीको क्रममा भएको हो। उक्त दुर्घटनामा ४० वर्षीय छोपिमा तामाङ घाइते भएका छन्। उनको जिवजिवे ग्रामीण अस्पतालमा उपचार भइरहेको छ।

वडा अध्यक्ष दावा तामाङका अनुसार गुम्बा निर्माणको क्रममा लापरवाहीका कारण दुर्घटना भएको हुनसक्ने आशंका गरिएको छ। प्रहरीले घटनाको थप अनुसन्धान गरिरहेको छ।