नुवाकोट जिल्ला स्तरीय महिला उद्यमी सम्मेलन सम्पन्न

नुवाकोट । नुवाकोटमा मंगलवार  जिल्ला स्तरीय महिला उद्यमी सम्मेलन २०८१सम्पन्न भएको छ ।

महिला उद्यमी महासंघ नेपालको आयोजनमा भएको कार्यक्रमको उद्घाटन गर्दै नेपालका लागि पाकिस्तानका राजदूत अब्रार एच हासमीले नेपालमा धेरै महिला उधमीहरु रहेको भन्दै खुशी व्यक्त गरे । उनले नेपालमा रहेका महिला उद्यमीहरुको सशक्त्रीकरण र आर्थिक समृद्धिको प्रवर्द्धनसँगै दिगो व्यवसायका लागि सरकारले वातावरण तयार गर्नुपर्ने धारणा राखे ।

राजदुत हसमीले महिला उद्यमीलाई वित्तीय पहुँच उपलब्ध गराउन आवश्यक रहेको र त्यसका लागि सहुलियतपूर्ण कर्जा अनुभव आदानप्रदान गर्नुपर्ने बताए । उनले पाकिस्तान र नेपालमा रहेका महिला उद्यमीहरुबीच सहकार्य गरेर अघि बढाउन आफु तयार रहेको बताए ।

कार्यक्रममा महिला उद्यमी महासंघ नेपाल (एफविन)को अध्यक्ष शोभा ज्ञवालीले महिला उद्यमी महासंघले वकालत, व्यवसाय विकास, क्षमता अभिवृद्धि र नेट्रोवर्किङको क्षेत्रमा काम गरिरहेको बताइन् ।

उनले महिला उद्यमीको विकास र विस्तारका लागि तथा उनीहरूलाई आर्थिक रुपमा सबल बनाउन महिला उद्यमी महासंघले काम गरिरहेको बताइन् । ज्ञवालीले आन्तरिक उद्यमीशलता नै देशको आर्थिक विकासको पाटो रहेको समेत उल्लेख गरिन् ।

यस्तै कार्यक्रममा महिला उद्यमी महासंघ नेपालको तृतिय उपाध्यक्ष बसन्ती प्रधानले महिला उद्यमी संघ ६७ जिल्लामा फैलिएको भन्दै आगामी दिनमा अन्य जिल्लामा समेत शाखा विस्तार गर्ने बताइन् । उनले महिला उद्यमी महासंघमा झण्डै ५ हजार ४ सय महिला उधमीहरु जोडिएको समेत बताइन् ।

कार्यक्रममा नुवाकोटका प्रमुख जिल्ला अधिकारी रामकृष्ण अधिकारीले पछिल्लो समय महिलाहरु चुलो चौकोमा मात्र समिति नरहेको भन्दै महिलाहरुको उद्योग र व्यवसायको क्षेत्रमा नेतृत्वदायी भुमिका रहेको भन्दै खुशी व्यक्त गरे ।

कार्यक्रममा जिल्ला उद्यमी संघ नुवाकोटको अध्यक्ष गिता अमात्यले स्थानिय स्रोत र साधनको प्रयोग गरि नुवाकोटका महिला उद्यमीहरुले काम गरिरहेको बताइन् । उनले नुवाकोटको मेवा र तरवुजाले बजार कब्जा गर्दा भारतबाट आयात गर्न नपरेको बताइन् । उनले नेपालको बजारमा नुवाकोटको उत्पादन जाँदा सकारात्मक सन्देश गएको बताइन् ।

कार्यक्रममा सहभागीहरुले उद्यम व्यवसाय सञ्चालनका लागि आवश्यक नीतिगत व्यवस्थासँगै प्रक्रियागत सहजता, तालिम, पूँजी, प्रविधि, दक्ष जनशक्ति र बजारीकरणसम्मका विद्यमान चुनौतीहरूबारे सम्मेलनमा उपस्थित महिला उद्यमीहरूले सरोकारवालाहरुलाई ध्यानाकर्षण गराएका छन् ।

साथै, थोरै पूँजी लगानीबाटै स्थानीय स्रोत(साधनको परिचालन गरी व्यवसाय सञ्चालन गर्न सकिने भएकोले महिला उद्यमी एवं लघु, घरेलु तथा साना उद्योगबाट ठूलो आर्थिक उन्नतिको सम्भावना रहेको पनि उनीहरूले औंल्याएका छन् ।

कार्यक्रममा महिला उद्यमी महासंघ नेपालको प्रथम उपाध्यक्षमा दर्शना श्रेष्ठ, द्वितीय उपाध्यक्षमा सुनिता वैद्य श्रेष्ठ, तृतीय उपाध्यक्षमा वसन्ती प्रधान र चौथो उपाध्यक्षमा महालक्ष्मी श्रेष्ठ, सचिव सुमित्रा पलाञ्चोके, नुवाकोट यद्योग वाणिज्य संघका अध्यक्ष राजेन्द्र श्रेष्ठ लगायतको उपस्थिति रहेको थियो ।

वि.स २०६० सालमा स्थापना भएका महिला उद्यमी महासंघ नेपालले महिलालाई आर्थिक रूपमा सशक्तीकरणका लागि पैरवी, सूचना प्रवाह, क्षमता अभिवृद्धि र व्यावसायिक परामर्श दिँदै आएको छ ।

महिला उद्यमीका आवश्यकता र चुनौती पूरा गर्न देशभरका महिला उद्यमीका व्यवसायलाई समावेशी तवरले विकास एवं प्रवद्र्घन गर्न सबै सरोकारवालाहरु एकजुट हुनुपर्ने कार्यक्रममा सहभागीहरुले बताएका छन् ।

कार्यक्रममा महिला उद्यमी संघ रसुवाका नव निर्वाचित कार्यसमितिका पदाधिकारीहरुको सपथ ग्रहण समेत गरिएको थियो ।