दुप्चेश्वरको मन्दिरको भेटी झण्डै पाँच लाख रुपैयाँ

नुवाकोट । नुवाकोटको प्रसिद्ध तीर्थस्थल दुप्चेश्वर मन्दिरमा झण्डै पाच लाख रुपिया भेटी रकम सङ्कलन भएको छ ।

यस वर्ष धान्य पूर्णिमामा लागेको मेलामा भक्तजनले चढाएको तथा दान गरेको उक्त रकम बराबर भेटी सङ्कलन भएको हो । दुप्चेश्वर क्षेत्र विकास कोषले बिहीबार दान तथा भेटीको गणना गरी सार्वजनिक गरे अनुसार हाटकर तथा भेटी ४ लाख ९३ हजार ८६५ रुपैयाँ सङ्कलन भएको कोषाध्यक्ष राजकुमार श्रेष्ठले जानकारी दिए ।

उनका अनुसार मेलामा पार्किङ तथा जुत्ता चप्पल व्यवस्थापन वापतको रकम भने गन्न बाकी रहेको छ ।
कोषाध्यक्ष श्रेष्ठका अनुसार मन्दिरमा हजारको ५ हजार रुपैयाँ, पाँच सयको ११ हजार पाँच सय रुपैयाँ, सयको १ लाख ११ हजार ७ सय, ५० को ९३ हजार ६५० रुपैयाँ, २० को ७३ हजार ६ सय रुपैयाँ, १० को ७२ हजार ९४० र ५ को ६३ हजार ५ रुपैयाँ संकलन भएको छ ।

कोषले भेटी गणना स्थानीय राजनीतिकर्मी, अगुवा युवा लगायतको उपस्थितिमा गरेको थियो । कोषाध्यक्ष श्रेष्ठले पछिल्लो वर्ष मन्दिरमा आउने भक्तजनको सहि व्यवस्थापनका लागि प्रयासरत रहेको बताए ।