नुवाकोट । तारकेश्वर गाउँपालिकाले सबै वडामा कार्यरत प्राविधिकहरूको सरुवा गरेको छ ।

आज गाउँपालिका अध्यक्ष शिव अधिकारीको निर्देशनमा गाउँपालिका प्रशासनले प्राविधिकहरूको कार्यक्षेत्र हेरफेर गरेको हो । गाउँपालिकाले दिएको जानकारी अनुसार, वडा नं १ मा कार्यरत सन्जु रेग्मीलाई वडा नं ३ मा खटाइएको छ भने वडा नं ३ मा कार्यरत डम्बर राज थापालाई वडा नं ६ मा पठाइएको छ ।

यस्तै, वडा नं ४ मा कार्यरत कवि कुँवरलाई वडा नं ५ मा, वडा नं ५ मा कार्यरत विकास लोप्चालाई वडा नं ४ मा र वडा नं ६ मा कार्यरत सीताराम अर्याललाई वडा नं १ मा पठाइएको छ । वडा नं २ मा कार्यरत बुद्ध लामा भने सोही वडामा रहने छन् ।

गाउँपालिका अध्यक्ष शिव अधिकारीले लामो समयदेखि एउटै वडामा रहेका प्राविधिकहरूलाई अझै चलायमान बनाउन अन्तर वडा सरुवा गरिएको बताएका छन् ।

नयाँ बजेट कार्यान्वयनको चरणमा रहेको र योजनाहरूको सर्भे र एस्टिमेट गर्ने समय भएकाले नयाँ ऊर्जाका साथ समयमै बजेट कार्यान्वयनमा खटिन प्राविधिकहरूलाई निर्देशन दिएको उनले बताए ।