बेलकोटगढी नगरपालिका वडा नम्बर ७ रातमाटेमा महादेबफाट जनस्वास्थ्य सेवा प्रालि सुरु

नुवाकोट, स्बास्थ्य सेवालाई नागरिकहरु माझ सहज रुपमा उपलब्ध गराउने उद्धेश्यका साथ नुवाकोटको बेलकोटगढी नगरपालिका वडा नम्बर ७ रातमाटेमा महादेबफाट जनस्वास्थ्य सेवा प्रालि सुरु भएको छ ।  शुक्रबार एक कार्यक्रमबीच प्रदेश सांसद केशव पाण्डेले अस्पताल उद्घाटन गर्नुभएको हो । कार्यक्रममा प्रदेश सांसद पाण्डेले अस्पताल स्थापनाले बेलकोटगढी नगरपालिका र तार्केश्वर गाउँपालिकाका नागरिकहरुलाई प्रत्यक्ष टेवा पुग्ने भएकोले गुणस्तरीय सेवा प्रदान गर्न आवश्यक रहेको बताउनुभएको छ ।  साथै उहाले मानव जीवनको लागी स्वास्थ्य महत्वपुर्ण रहेको भन्दै अस्पताललाई सुविधा सम्पन्न र व्यवस्थित बनाउन प्रदेश सभाबाट पनि सहयोग गर्ने प्रतिवद्धता जनाउनुभएको छ ।
यस्तै, कार्यक्रममा प्रदेश नम्बर ३ का सांसद हिरानाथ खतिवडाले स्थानियलाई छिटो, छरितो सेवा प्रदान गर्नको लागी स्थापना भएको अस्पतालले कोही बिरामी पनि उपचारबाट बञ्चित नहुने बताउनुभएको छ ।  कार्यक्रममा बेलकोटगढी नगरपालिकाको प्रमुख राजेन्द्ररमण खनालले नागरिकहरु सामान्य बिरामी हुदा सदरमुकाम बिदुर र राजधानी जान पर्ने बाध्यता अन्त्य भएकोले अस्पतालबाट बिरामीलाई सरल र सुलभ रुपमा स्वास्थ्य सेवा लिन पाउने व्यवस्था मिलाउन नगरपालिका प्रतिवद्ध रहेको बताउनुभएको छ ।  स्थानिय ५० जनाको लगानीमा सञ्चालनमा आएको जनस्वास्थ्य सेवा प्रालिको उद्घाटन कार्यक्रममा संस्थाका अध्यक्ष गेहेन्द्रबहादुर न्यौपानेले उपचार गराउन आएका बिरामीहरुलाई छिटो, सरल तथा गुणस्तर सेवा दिन अस्पताल प्रतिवद्ध रहेको जनाउनुभएको छ ।  कार्यक्रममा बेलकोटगढी नगरपालिकको उपप्रमुख कबिता ढुङगाना, तार्केश्वर गाउँपालिका उपाध्यक्ष तारादेबी रिमाल, नेपाल चिकित्सक संघका पुर्व अध्यक्ष केदारनरसिंह केसी, बेलकोटगढी नगरपालिका वडा नम्बर ७ का अध्यक्ष हेमनिधि नेपाल, महादेब बहुमुखी क्याम्पस रातमाटेका अध्यक्ष रामचन्द्र नेपाल लगायतले अस्पताल स्थापनाले बिरामीहरुलाई स्थानिय स्तरबाटै टेवा पुगेको भन्दै गुणस्तरीय सेवा प्रदान गर्न सुझाव दिएका छन् ।