केसीको प्र‍श्न : सत्तामा बसेका शक्तिसम्पन्नको मिलेमतो नभई एयरपोर्टबाट सुन बाहिरिन्छ ?

नुवाकोट । नेपाली कांग्रेसका सांसद अर्जुननरसिंह केसीले सत्तामा रहेका शक्तिसम्पन्न व्यक्तिको मिलेमतोबिना विमानस्थलबाट सुन बाहिरिन नसक्ने बताएका छन् ।

बिहीबार सिंहदरबारमा सञ्चारकर्मीहरुसँगको कुराकानीमा उनले गत साउन २ गते त्रिभुवन अन्तर्राष्ट्रिय विमानस्थलबाट तस्करी भएको सुन प्रकरणको छानबिनका लागि उच्चस्तरीय आयोग बनाउनुपर्ने माग गरे ।

उनले दुईटा मोबाइल र दुई तोला सुनसमेत नछोड्ने विमानस्थलबाट क्विन्टल सुन बाहिरिनुले सत्ता केन्द्रको संलग्नता रहने स्पष्ट हुने उल्लेख गरे ।

‘एउटा सियो, एउटा मोबाइल, दुई तोला सुन एक्सरे गरेर हेर्ने एयरपोर्ट सत्तामा बसेका शक्तिसम्पन्न व्यक्तिको मिलेमतो र संलग्नता नभइकन एक क्विन्टल सुन एयरपोर्टबाट बाहिर निस्किन्छ ? त्यसलाई छान्नको निम्ति निष्पक्ष, पारदर्शी, न्यायिक आयोग गठन हुनुपर्छ’ उनले भने ।

उनले अहिले प्रतिपक्षले संसदलाई बन्धक बनाइरहेको आरोप लगाए । ‘प्रतिपक्षले संसद अवरोध गर्ने अनि सत्तापक्षलाई गाली गरेर के हुन्छ ? संसदलाई जहिले पनि बन्धक राख्नेकुरा प्रतिपक्षको निरन्तर स्वभावकै रुपमा परिणत भएको छ । पहिला ५९ दिन संसद बन्द भएको इतिहास छ । अहिले पनि त्यस्तै चल्दैछ’ उनले भने ।

विपक्षीले उठाएका कतिपय मुद्दाहरुमा आफ्नो सहमति रहेको केसीले बताए ।’उहाँहरुले उठाउनुभएको इएस्युजहरुमा हाम्रो पनि सहमति छ ।

जाँचबुझ ऐन, २०२६ अन्तर्गत उच्चस्तरीय न्यायिक समिति बनाउनुपर्छ भनेर म आफैँ पनि भनिरहेको छु । सर्वोच्च अदालतको न्यायाधीश, पूर्वन्यायाधीशहरु राखेर समिति बनाऔं’ उनले भने ।