अधेरी खोलाले बगाउँदा तुप्चेका खड्का बेपत्ता

नुवाकोट । अविरल वर्षासँगै आएको बाढीका कारण विदुर नगरपालिका वडा नम्बर ७ तुप्चेको अधेरी खोलाले एक जनालाई बेपत्ता बनाएको छ ।

बेपत्ता हुनेमा विदुर नगरपालिका वडा नम्बर ७ तुप्चेका अन्दाजी ३१ वर्षका प्रदिप खड्का रहेका छन् । आउँटारबाट तुप्चे (रातमाटे) तर्फ गइरहेका उनलाई अन्दाजी १० ः ३० बजे खोलाले बगाएको हुनसक्ने प्रहरीले आशंका गरेको छ ।

शुक्रवार राती पानी परेसँगै अधेरी खोलाको पुलमाथिबाट पानी बगेको थियो । अधेरी खोलाबाट झण्डै एकसय मिटर तल उनले चढ्ने गरेको बा ८९ प ९५३८ नम्बरको कालो रङको पल्सर मोटरसाईकल र रेनकोट भेटिएको विदुर नगरपालिका वडा नम्बर ७ का वडाध्यक्ष रविन्द्र नेपालले जानकारी दिए । खड्का हिजो राती देखिनै सम्पर्कविहिन भएको उनको खोजी भइहरेको वडाध्यक्ष नेपालले जानकारी दिए ।

बेपत्ता भएका खड्कालाई खोलाले बगाएको आशंकमा अहिले खोजी भइरहेको छ । खोजी कार्यका लागि सशस्त्र प्रहरीको तालिम प्राप्त डिजास्टर म्यानेजमेन्ट टोलीसहित जनपथ प्रहरी, जनप्रतिनिधि र स्थानियहरु खटिएका छन् ।

सशस्त्र प्रहरीको तालिम प्राप्त डिजास्टर म्यानेजमेन्ट टोलीले त्रिशुली खोलाको दोभानमा खोजी गरिरहे पनि नभेटिएको शसस्त्र प्रहरी विदुरका डिएसपी जगन्नाथ खड्काले जानकारी दिए ।