नुवाकोटमा रााष्ट्रिय परिचय पत्रको विवरण संकलन गर्ने टोली गाउँगाउँमा

नुवाकोट । नुवाकोटमा रााष्ट्रिय परिचय पत्रको विवरण संकलन गर्न विवरण संकलन गर्ने टोलीहरु टोल टोलमा पुगेको छ ।

सर्वसाधारणको सुविधाका लागि नुवाकोटमा पहिलो पटक राष्ट्रिय परिचयपत्र विवरण संकलन अभियान सञ्चालन भएको छ । नुवाकोटको १२ ओटा स्थानीय तहका ८८ वटै वडाबाट पूर्ण विवरण संकलन गर्न टोली खटिएको हो ।

गत जेठ १२ गतेबाट सुरु भएको बिवरण संकलन अभियान म्यागङ गाउँपालिकाबाट सुरु भई दुप्चेश्वर, किस्पाङ र तारकेश्वरमा समाप्त सकिएको छ भने सूर्यगढी र लिखु गाउँपालिकामा अभियान संचालन भईरहेको छ ।

राष्ट्रिय परिचयपत्र तथा पञ्जीकरण विभागले विदुरमा सबै स्थानीय तहका जनप्रतिनिधि तथा सरोकारवालालाई सचेतना कार्यक्रम सञ्चालन गरेपछि टोली पालिकास्तरमा पुगेको हो ।

हालसम्म नुवाकोटमा ४४ हजारभन्दा बढीको विवरण संकलन भइसकेको छ । वि.स २०७७ सालमा राष्ट्रिय परिचयपत्रका लागि आवेदन परेका एक हजार चारसय ८१ जनाको हाल परिचयपत्र बनेर आएको छ ।

नुवाकोटमा २०७७ साल असार ३१ देखि एउटा स्टेशनबाट बिवरण संकलन सुरु गरिएकोमा सेवाग्राहीको चाप बढ्दै गएपछि २०७९माघबाट ३ वटा स्टेशनमा विवरण संकलन गर्ने काम भईरहेको छ ।