नुवाकोटमा साथीले बोकेको बन्दुक पड्किँदा एक जनाको ज्यान गयो

नुवाकोट । नुवाकोटमा साथीले बोकेको भरुवा बन्दुक पड्केर एक जनाको मृत्यु भएको छ ।

मृत्यु हुनेमा म्यागङ गाउँपालिका वडा नम्बर ४ किम्ताङका २६ वर्षीय पञ्च घलेको रहेका छन् । उनको आफ्नै साथी अमित तामाङले बोकेको भरुवा बन्दुक पड्किँदा मृत्यु भएको प्रहरीले जनाएको छ ।

गाउँर्कै गङमरङ सामुदायिक वनमा पञ्च घले र अमित तामाङ सिकार खेल्न हिँडेका थिए । अचानक भरुवा बन्दुक पड्केर छर्रा लाग्न गई घलेको मृत्यु भएको जिल्ला प्रहरी कार्यालयका सूचना अधिकारी एवं डीएसपी खगेन्द्रबहादुर खड्काले जानकारी दिए ।

उनीहरु शनिबार साँझ सिकार खेल्न भनेर घरदेखि २ घन्टाको बाटोमा हिँड्दै गरेको अवस्थामा लड्न गई भरुवा बन्दुक पड्केर घलेलाई लागेको प्रहरी समक्ष दिइएको बयानमा भनिएको छ ।

शवको जिल्ला अस्पतालमा त्रिशुलीमा पोष्टर्माटम गरी मृतकको परिवारलाई जिम्मा लगाइएको प्रहरीले जनाएको छ । घटनाको विस्तृत अनुसन्धान भइरहेको प्रहरीले जनाएको छ ।

घटनास्थल सदरमुकाम विदुरदेखि करिब ३५ किमी पश्चिमोत्तर भाग धादिङको सिमानामा पर्छ ।