विश्र मधुमेह दिवसको अवसरमा एकसय ५० भन्दा बढीको निशुल्क सुगर परिक्षण

नुवाकोट । विश्व मधुमेह दिवसको अवसर पारेर नुवाकोटमा विभिन्न कार्यक्रमको आयोजना गरिएको छ ।

यसैक्रममा विदुर नगरपालिका वडा नम्बर २ मा रहेको सुलभ फार्मेसीले एकसय ५० जनाभन्दा बढीको निशुल्क सुगर जाँच गर्नुको साथै ३० जनाको आँखा परिक्षण गरेको छ ।

नुवाकोटमा पछिल्लो समय सुगरका विरामीको बढ्दो संख्यालाई मध्यनजर गरेर दिवसको अवसर पारेर निशुल्क सुगर जाँचको व्यवस्था गरिएको सुलभ फार्मेसीका संचालक निरज जिसीले जानकारी दिए ।

यस्तै मधुमेह दिवसकै अवसर पारेर फार्मेसीले नेपाल रेडक्रस सोसाइटी जिल्ला शाखा नुवाकोटको प्राविधिक सहयोगमा रत्तदान कार्यक्रमको समते आयोजना गरेको छ । रत्तदान कार्यक्रममा ५० जना रत्तदाताहरुले रगत दान गरेका थिए ।

आम नागरिकहरुलाई आफ्नो स्वास्थ्यतर्फ सचेत गराउन आगमी दिनमा समेत निशुलक आँखा जाँचका साथै सुगर परिक्षणको व्यवस्था मिलाइने फार्मेसीका संचालक जिसीले बताए ।

अन्तर्राष्ट्रिय मधुमेह संघका अनुसार सन् २०२१ मा मात्रै विश्वमा ६७ लाख मानिसको मधुमेहका कारण मृत्यु भएको छ । विश्वभर ५३ करोड ७० लाख मानिस मधुमेह पीडित रहेको संघले जनाएको छ ।

संसारमा कुल अन्धोपनामध्ये ४ दशमलव ८ प्रतिशत मधुमेहका कारणले हुने गरेको छ । चिकित्सकका अनुसार मधुमेहले रेटिनाको रक्त नसामा पनि असर गर्छ । कम शारिरीक परिश्रम, फास्टफुड, चिल्लो, गुलियो खानेकुराको बढी प्रयोग मोटोपना र तनावका कारण मधुमेह रोग बढ्दै गएको चिकित्सकको भनाई छ ।

मधुमेहको कारण मुटु, आँखा मिर्गौला तथा नसामा समेत असर गर्छ । मुख सुक्खा हुने, पिसाब लागिरहने, धेरै भोक लाग्ने, तौल घट्ने, घाउ निको हुन समय लाग्ने, हातगोडा झमझमाउने, निदाउने वा गल्ने जस्ता लक्षण देखिएमा तुरुन्त जाँच गराउनुपर्ने चिकित्सकको सुझाव छ ।