नुवाकोट कारागारमा अस्थायी मतदान केन्द्र, २४ कैदीबन्दीले मतदान गर्न पाउने

नुवाकोट ।  आगामी मंसिर ४ गते हुने निर्वाचनमा नुवाकोट जिल्ला कारागारमा रहेका २४ जना कैदीबन्दीले भोट हाल्ने पाउने भएका छन् ।

निर्वाचन आयोगले जिल्ला कारागारलाई अस्थायी मतदान केन्द्रको रुपमा स्वीकृति दिएपछि उनीहरुले मतदान गर्न पाउने भएका हुन् । कारागार प्रमुख गंगालाल गिरीका अनुसार मतदाता नामावलीमा नाम भएका ३५ जना कैदीबन्दीको सूची पठाइएकोमा निर्वाचन कार्यालयबाट २४ जनाको मात्र अस्थायी मतदाताको सूचीमा दर्ता भएर आएको हो । कारागारमा १ सय ६६ जना कैदीबन्दी छन् । तीमध्ये १६ जना महिला र १ सय ५० जना पुरुष छन् ।

यसअघि २०७० सालको निर्वाचनमा पनि कैदीबन्दीले मतदान गर्न पाएका थिए भने ०७४ सालको निर्वाचनमा उनीहरू मतदान गर्नबाट वञ्चित भएका थिए । यसपटक उक्त कारागारमा ३ महिला र २१ जना पुरुष भोट हाल्न पाउने छन् ।

उनीहरूले प्रतिनिधिसभा समानुपातिकतर्फ मात्र मतदान गर्न पाउने जिल्ला निर्वाचन कार्यालय नुवाकोटका प्रमुख जयप्रसाद गौतमले बताए । प्रदेशसभाको समानुपातिकतर्फ भने कैदीबन्दीले भोट हाल्न नपाउने कार्यालयले जनाएको छ ।

यससँगै निर्वाचनमा खटिएका कर्मचारीले समेत आफू खटिएको मतदान केन्द्रबाट भोट दिन पाउने भएका छन् । नुवाकोटमा २ हजार ३०४ जना कर्मचारी निर्वाचनका लागि परिचालन गरिने भएको छ ।

जिल्ला निर्वाचन कार्यालयका अनुसार नुवाकोटमा अस्थायी मतदान केन्द्रको रुपमा जिल्ला कारागार र जिल्ला प्रहरी कार्यालयभित्र अस्थायी मतदाताका लागि मतदान केन्द्रको व्यवस्था गरिएको छ ।

जिल्लाका विभिन्न कार्यालयमा कार्यरत कर्मचारी, सुरक्षाकर्मीले संघीय संसद्का लागि समानुपातिक निर्वाचन प्रणालीमा मतदान गर्न पाउने छन् । नुवाकोटमा संघीय संसद्को २ र प्रदेशसभाका लागि ४ निर्वाचन क्षेत्र रहेका छ ।

यहाँ कुल २ लाख ३९ हजार ७२६ जना मतदाता छन् । नुवाकोटमा १३२ मतदानस्थल र २८८ मतदान केन्द्र र २ अस्थायी मतदान केन्द्र रहेका छन् ।