विदुर खानेपानी निर्वाचनमा गठबन्धन दलको लजास्पद हार, एमालेको प्यानल नै विजयी

नुवाकोट । विदुर खानेपानी सरसफाई तथा उपभोत्ता समितिको निर्वाचनमा उपाध्यक्ष वाहेक संजीव श्रेष्ठको प्यानल नै विजयी भएको छ ।

शुक्रवार विहान सम्पन्न भएको मतगणनमा नेपाली कांग्रेस, माओवादी केन्द्र र एकिकृत समाजवादीका साझा उम्मेद्धवार नेपाली कांग्रेसका छत्र वहादुर डंगोलको प्यानललाई पराजित गरि एमाले–राप्रपाका साझा उम्मेद्धवार रहेका एमालेका संजीव श्रेष्ठको प्यानल नै विजयी भएको हो ।

कांग्रेसका नेता अर्जुननरसिंह केसी, जगदिश्वरनरसिंह केसी, विदुर नगरपालिकाका प्रमुख राजनलाल श्रेष्ठसहित नेकपा माओवादी र समाजवादीका नेताहरू निर्वाचनको दिन मैदानमै खटिएपनि खानेपानीको चुनावमा गठबन्धन दललाई उपभोक्ताले अस्वीकार गरेका हुन् ।

स्थानीय निर्वाचनमा नमिठो हार व्यहोरेको एमालेले खोनपानी उपभोक्ता संस्थाको चुनाव जितेपछि केही राहतको महशुष गरेको छ । कुल ३ हजार एकसय ४१ मतदाता रहेको खानेपानी संस्थामा बुधबार भएको निर्वाचनमा २ हजार ३ सय २५ मत खसेको थियो ।

अध्यक्षमा विजयी भएका नेकपा एमालेका नेता सञ्जिवबहादुर श्रेष्ठले अध्यक्षमा १२७१ मत प्राप्त गरेका छन । पाँच दलीय सत्ता गठबन्धनका तर्फबाट उम्मेदवार बनेका नेपाली कांग्रेसका नेता छत्रराज डंगोलले ९४७ मत प्राप्त गरेका छन ।
उपाध्यक्षमा कांग्रेसका उम्मेद्धवार नवराज न्यौपाने विजयी भएका छन् । उनले ९८३ मत प्राप्त गरेका छन् । उनका निकटतम प्रतिदन्द्धी राप्रपाका महेश कुमार डगोलले ९४५ मत प्राप्त गरेका छन् । यस्तै उपाध्यक्षमा स्वतन्त्र उम्मेद्धवारी दिएका मुरारी नेपालले २२७ मत पाए ।

सचिवमा एमालेकै राजेन्द्र पाण्डे १२६४ मत ल्याएर विजयी भएका छन् । उनक निकटतम प्रतिद्धन्दी समाजवादीका नरेश डंगोलले ८७४ मत पाएका छन् ।

कोषाध्यक्षमा अम्बिका चित्रकारले ११८८ मत ल्याएर विजयी भइन् । उनको निकटतम प्रतिदन्दी रविता भट्टले ९२४ मत प्राप्त गरिन ।

महिला सदस्यमा विजयी भएका विष्णुमाया डंगोलले ११६७ र सिता अधिकारीले १०९९ मत प्राप्त गरे । यस्तै पराजित शान्ति श्रेष्ठले ९१० र शुशिला पौडेलले ८९४ मत पाए ।

यस्तै सदस्यमा कृष्ण प्रसाद भट्टले ११३९, दिपक तिम्सिनाले ११०३ र लव प्रसाद न्यौपानेले १०३३ मत प्राप्त गरेर विजयी भए । गठबन्धनका उम्मेद्धवार रामजी भट्ट ९३३, राजेन्द्र सापकोटा ८६१ र पदमकान्त न्यौपानेले ८११ मत प्राप्त गरे ।

यस्तै सदस्यमा स्वतन्त्र उम्मेद्धवारी दिएका विमल खड्काले एकसय ८२ मत प्राप्त गरे ।

खानेपानीको चुनावमा सत्तारूढ दलहरू नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी जसपा लगायत एकै प्यानल बनाएर मैदानमा उत्रिएका थिए । तर एमाले एक्लै उनीहरूका लागि भारी भएको छ ।

सन्जिव बहादुर श्रेष्ठ नेकपा एमालेको विदुर नगरपालिका इन्चार्ज समेत हुन । प्यानलमा रहेका मध्ये उपाध्यक्ष डंगोल राप्रपाका हुन ।

विदुर खानेपानी सरसफाई तथा उपभोत्ता समितिले विदुर नगरपालिकाको वडा नम्बर १, २, ३, ४, ५, ६ र ९ मा खानेपानी वितरणमा संस्थाले काम गर्दै आएको छ ।