नुवाकोट । नुवाकोटमा नेपाली कांग्रेसभित्र केसी र महत परिवारको राजनीतिक लडाई नौलो होइन ।

तीन दशकदेखिको यो परिवारबीचको लडाई नुवाकोटको राजनीतिमा प्रतिष्ठाको विषय बनिसकेको छ । कांग्रेसभित्रको आन्तरिक प्रतिस्पर्धादेखि राष्ट्रिय राजनीतिमासमेत केसी र महत परिवारबीचको लामो द्वन्दको असर प्रष्टै देखिन्छ ।

कांग्रेसको क्रियाशीलसदस्यता वितरणदेखि स्थानीय अधिवेशनका साथै आमनिर्वाचनमा पनि यी दुई परिवारबीचको टकराव कम भएको छैन, बरु झनै झांगिदै गएको छ । केसी र महत परिवारका दुई शीर्ष नेताहरु अर्जुननरसिंह केसी र डा. रामशरण महत हुन् । यी दुबै नेता कांग्रेसभित्र प्रभावशाली नेताका रुपमा चिनिन्छन् । यी दुई नेताबीचको द्वन्द नुवाकोटमा दोस्रो पुस्ता हुँदै तेस्रो पुस्तासम्म पुगिसकेको नुवाकोट कांग्रेसकै नेताहरु बताउने गर्छन् ।

२०४८ सालदेखि निरन्तर संघीय निर्वाचनमा प्रतिस्पर्धा गर्दै आएका यी दुई नेताले मुलुक संघीयतामा गएपछि आफ्नै परिवारका दोस्रो पुस्ताका नेताहरुलाई पनि प्रदेश सभा टिकट दिलाए । दुई परिवारबीचको लडाईले नुवाकोटमा अरुले अवसर नै नपाउने अवस्था आएका गुनासो जिल्लाका नेताहरुको छ । सरकारले प्रतिनिधिसभा र संघीय निर्वाचनको मिति घोषणा गरेपछि नुवाकोटमा टिकटको दौडधुप सुरु भइसकेको छ ।

दुई वटा निर्वाचन क्षेत्र रहेको नुवाकोटमा संघमा दाई नेताहरु (केसी र महत) कै दावी छ भने प्रदेशमा पनि उनीहरुकै परिवारका सदस्यहरुको रोजाई पाइन्छ । तर पाँच दलीय सत्ता गठबन्धनबीच चुनावी तालमेल गर्ने सहमति अनुसार नुवाकोटमा एउटा निर्वाचन क्षेत्र कांग्रेसले गुमाउनुपर्नेछ । संघमा कांग्रेसले एक र माओवादी केन्द्रले एक सिट पाउने सम्भावना धेरै छ । तर केसी र महत परिवारले भने दुवै निर्वाचन क्षेत्रमा आफ्नो दावी छोडेका छैनन् ।

सत्तारुढ दलभित्र सिट बाँडफाँटबारेमा छलफल भइरहेका बेला महत परिवारकै सदस्य डा. प्रकाशशरण महतले पनि नुवाकोट निर्वाचन केन्द्रीत गतिविधि तीब्र बनाएका छन् । अर्जुननरसिंह र रामशरण महतबीचको लडाईंका कारण नुवाकोटबाट विस्थापित हुन बाध्य प्रकाशशरण यसपटक गृहजिल्लाबाटै निर्वाचन लड्ने मनस्थितिमा छन् । नुवाकोट १ मा २०७४ सालको निर्वाचनमा माओवादीका हितमान तामाङ निर्वाचित भएका थिए ।

माओवादीले आफ्नो प्रभाव क्षेत्र भएको भन्दै यो क्षेत्र आफैसँग राख्ने सम्भावना धेरै छ । तर लामो समयदेखि रामशरण महतले प्रतिस्पर्धा गर्दै आएको यो निर्वाचन क्षेत्रमा यसपटक भाई प्रकाशशरण महतले पनि नजर लगाएका छन् । कांग्रेसबाट रामशरण महत, प्रकाशशरण महतका साथै केदारनरसिंह केसीले यहि क्षेत्रबाट चुनाव लड्ने तयारी गरेका छन् भने एमालेबाट बद्री मैनाली संघीय निर्वाचनमा प्रतिस्पर्धामा उत्रिने सम्भावना धेरै रहेको एमालेका नेताहरु बताउँछन् ।

त्यस्तै नुवाकोट २ मा २०७४ सालको निर्वाचनमा एमालेका नारायण खतिवडा निर्वाचित भएका थिए । एमालेबाट उनै दोहोरिने लगभग पक्कापक्की छ । कांग्रेसबाट अर्जुननरसिंह केसी एक्ला उम्मेदवार छन् । नुवाकोट १ मा गठबन्धनबाट माओवादीको भागमा परे प्रकाशशरण महतले यहि निर्वाचन क्षेत्रबाट पनि चुनाव लड्ने सोच बनाएको कतिपय नेताहरुको भनाई छ ।

तर कांग्रेस प्रवक्ता महतले भने कहाँबाट निर्वाचन लड्ने भन्नेमा मुख खोलेका छैनन् ।