विदुर खानेपानीको बिल ईसेवाबाटै तिर्न सकिने

नुवाकोट ।  विदुर खानेपानी तथा सरसफाई उपभोक्ता संस्थाले मोबाइल र इन्टरनेटबाट महशुल तिर्ने व्यवस्था गरेको छ ।

तेस्रो साना शहरी खानेपानी आयोजना अन्तर्गत संस्थाले बिहीबारदेखि ई-सेवासँग सहकार्य गरेर अनलाईनबाटै महशुल तिर्ने सेवा संचालनमा ल्याएको कार्यालय प्रमुख राजकुमार तिमिल्सिनाले जानकारी दिए ।

सेवाग्राहीहरुलाई रकम भुक्तानी गर्दा सहज र छिटो छरितो र आधुनिक सेवा दिने उद्देश्यले अनलाईन सेवा सञ्चालनमा ल्याएको उनले बताए ।

खानेपानीको बिल नुवाकोटका तीन सहकारीको मोबाईल एपबाट पनि तिर्न सक्ने भएको छ । संगम साकोस त्रिशुली साकोस र सहयोगी बहुउद्देश्यीय सहकारीका मोबाईल एपका प्रयोगकर्ता तथा सदस्यहरुले पनि मोबाइलबाटै तिर्न सक्नेछन् । साथै एम डबली एपबाट पनि खानेपानीको बिल तिर्न सक्नेछ ।

काउन्टरमा गएर महसुल भुक्तानी गर्न सकिने व्यवस्था पनि यथावत नै राखिएको संस्थाले जनाएको छ ।

३५ सयभन्दा बढी सदस्य रहेको संस्थाले विदुर नगरपालिकाको वडा नम्बर १, २ ,४, ५, ६ र ९ का क्षेत्रमा सेवा प्रदान गर्दै आईरहेको छ ।