ढुंगेदेखि पिपलटारसम्मको प्रभावितलाई मुअब्जा देऊ : लामा

नुवाकोट । नेपाली कांग्रेसका केन्द्रीय सदस्य समेत रहेको सांसद बहादुरसिंह लामाले जग्गा वर्गीकरणको नाममा सर्वसाधारणलाई दुःख दिएको भन्दै आक्रोश पोखेका छन् ।

बुधबार बसेको प्रतिनिधि सभाको बैठकमा विशेष समय लिएर बोल्ने क्रममा सांसद लामाले सरकारले तयारी नै नगरेर जग्गा वर्गीकरणको अधिकारी स्थानीय तहलाई दिँदा समस्या भएको हो ।

‘भूमिमा धेरै कुराहरू आउँछ । जग्गा वर्गीकरणको नाममा अहिले जनताले उपभोग गर्न पाएको छैन । कसैले ऋण लिन तयार होला । कोही बच्चाहरू पढाउन ऋण लिन बैंकसँग प्रयास गरेको होला’, उनले भने, ‘जनताले सिफारिस पाउँदैन । त्यसको कारण जग्गा वर्गीकरणको जिम्मा स्थानीय तहलाई लगाइदिएको छ ।’

‘सिफारिस कसले दिने हो ? सिफारिस नदिँदा समस्या भएको छ । यस्तो अवस्था कसरी आयो ? यो अवस्थालाई वर्गीकरण गरेर कहाँ उद्योग खोल्ने ? कहाँ कृषि योगय जमीन घरघडेरी हुने जमीन यो आवास क्षेत्र भनेर कसरी घोषणा गर्ने ? स्थानीयले पनि घोषणा गरेको छैन’, उनले प्रश्न गर्दै भनेका छन् ।

‘यो चाहिँ एउटा चलखेल गर्ने जस्तो देखियो । यसलाई वास्तविक रुपमा जनताले उपभोग गर्ने अधिकार छ, मौलिक अधिकार पनि छ, संवैधानिक अधिकार पनि छ’, उनले भने, ‘जनताले पाउने अधिकारलाई पनि सुनिश्चित गर्न सकिएको छैन । जमीनमा चलखेल भएको छ । यसलाई कसरी फुकाउने हो ? सरकारले ध्यान दिनुपर्छ ।’

उनले भने, ‘पहिला नै योजना बनाएर वर्गीकरण गर्नुपर्ने थियो । अहिले गएर स्थानीयलाई दिएको छ । स्थानीय तहले कसरी वर्गीकरण गर्ने ? वर्गीकरण गर्न समय लाग्छ । त्यो समयमा ठूलो चलखेल हुन्छ ।’

यसैबीच, कांग्रेसका सांसद लामाले नुवाकोट जिल्लाको पाशाङ लाम्हु मार्ग दश वर्षसम्म पनि निर्माण हुन नसकेको भन्दै चिन्ता जनाएका छन् ।

‘दश वर्ष अगाडिको कुरा हो । पासाङ लाम्हु मार्गमा ठेक्का दश वर्ष अगाडि लागेको हो । यो ठेक्का रिड भन्ने प्रोजेक्टमा भएको र एक्जिम बैंकबाट फाइनान्स गरेको थियो । त्यहाँका जनताहरू धेरै खुशी थिए दश वर्ष अगाडि । पिच राम्रो हुन्छ । सबैले सुविधा भोग गर्न पाउँछन् भनेर’, उनले भनेका छन् ।

‘बिडम्बनाको कुरा दश वर्षसम्म पनि बालाजुदेखि रानीपौवा, रानीपौवादेखि पिपलटारसम्मको सडक अहिलेसम्म दुरदशाको रुपमा छ । अहिलेसम्म निर्माण भएको छैन । कसैले पनि चासोका रुपमा हेरेको छैन । दश वर्षसम्म त्यहाँको यस्तो अवस्था छ’, उनले भने, ‘खाल्टाखुल्टी मात्र नभएर पहिरो र हिलो छ । सडकमा धान पनि रोपियो ।’

उनले भने, ‘यो सडकलाई पुनर्जीवन बनाउन १९१८ सालमा बनेको सडक हो । काठमाडौंबाट नुवाकोटको त्रिशूली जाने बाटो अहिलेसम्म सरकारले नहेरेकाले ध्यानपूर्वक हेर्नु पर्छ ।’

‘त्यो सडकबाट बिरामी, सुत्केरीलाई कसरी ल्याउने भनेर समस्या भएको छ’, सांसद लामाले भनेका छन् ।

‘गल्छी–त्रिशूली सडक पनि केरुङ नाका जोड्ने सडक हो । यो सडक जम्मा ४५ किलोमिटर छ । ४० किलोमिटरलाई मुआब्जा दियो । ५ किलोमिटरलाई दिएन । यो कस्तो बिडम्बना हो । ५ किलोमिटरलाई मुआब्जा नदिएको कारणले गर्दा सडक अबरुद्ध भएको छ’, लामाले भनेका छन् ।

‘सरकारले तत्काल मुआब्जा दिनुपर्छ । पिपलटारदेखि ढुंगेसम्मको सडकलाई मुआब्जा दिएको छैन’, कांग्रेसका सांसद लामाले भनेका छन् ।