बेलकोटगढी नगरपालिका भित्रका विद्यालय आजबाट खुल्ने

नुवाकोट । नुवाकोटको बेलकोटगढी नगरपालिकाभित्र रहेका सामुदायिक तथा संस्थागत विद्यालयहरु आजबाट खुल्ने भएका छन् ।

आईतवार बेलकोटगढी नगरपालिकाले एक सुचना प्रकाशित गर्दे पहिलो चरणमा कक्षा ८ देखि १२ सम्मको विद्यालय स्वास्थ्य मापदण्ड पालना गर्दे विद्यालय खोल्न आग्रह गरेको हो ।

नगरपालिकाका निमित्त प्रमुख प्रशासकिय अधिकृत दामोदर दाहालले पहिलो चरणमा सोमवारदेखि कक्षा ८ देखि १२ सम्म भौतिक उपस्थितिमा पढाई हुने र अन्य कक्षाहरु वैकल्पिक सिकाइको माध्यमबाट कक्षा संचालन गर्न आग्रह गरे ।

यस्तै आगामी फाुगन १ गतेबाट सबै कक्षाहरु पनि भौतिक उपस्थितिमा सम्पुर्ण कक्षाहरु समेत संचालन गर्न उनले आग्रह गरेका छन् ।

यससँगै भौतिक उपस्थितिमा कक्षा संचालन गर्ने जिल्लाको पहिलो स्थानिय तह बेलकोटगढी नगरपालिका बनेको छ । जिल्लाका अन्य पालिकाले भने भौतिक रुपमा कक्षा संचालन गर्ने विषयमा कुनै निर्णय गरेका छैन ।

तर अन्य स्थानिय तहमा रहेका सामुदायिक तथा निजि विद्यालयहरुले अनौपचारिक रुपमा विद्यालयका कक्षाहरु भौतिक रुपमा नै आलोपालो गरि संचालन गरिरहेका छन् ।

यसअघि नुवाकोटमा कोरोना संक्रमणको दर बढेसँगै जिल्लामा रहेका विद्यालयहरु माघ पहिलो साताबाट बन्द गरिएको थियो ।