नेपालमा एकैदिन ६,७३४ जनामा कोभिड संक्रमण

नुवाकोट । एकैदिन नेपालमा ६ हजार ७३४ जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयको नियमित अपटेड अनुसार २४ घण्टामा भएको कुल १७ हजार ४६५ नमुना परीक्षणमध्ये मध्ये सो संख्यामा संक्रमण पाइएको हो ।

१४ हजार १४ पीसीआर परीक्षण गर्दा ५ हजार ७४७ जनामा र ३ हजार ४५१ एन्टिजेन परीक्षण गर्दा ९८७ जनामा संक्रमण देखिएको हो । आइतबारको तुलनामा सोमबार थपिएका संक्रमितको संख्या एक हजार ७७३ जनाले बढि हो । आइतबार ४ हजार ९६१ जनामा संक्रमण देखिएको तथ्यांक सार्वजनिक गरिएको थियो ।

सोमबार कोरोना निको भएर डिस्चार्ज हुनेको संख्या ५४७ रहेको मन्त्रालयले जनाएको छ । सोहि अवधिमा संक्रमणका कारण ज्यान गुमाउनेको संख्या भने तीन रहेको छ ।

उपत्यकामा नै झण्डै ४,००० जनामा संक्रमण पुष्टि

साेमबार काठमाडौंमा २,९४३ जना, ललितपुरमा ७९५ जना र भक्तपुरमा २०१ जना संक्रमित थपिएका छन् । यसरी यस दिन उपत्यकामा कुल तीन हजार ९३९ जनामा संकम्रण पुष्टि भएको छ ।

हाल देशमा ३० हजार ८७७ जना सक्रिय संक्रमित छन् । यस्तै क्वारेन्टिनमा १०० जना रहेका छन् ।