नेपालमा कोरोना संक्रमितको संख्या ह्वात्तै बढ्यो

नुवाकोट । नेपालमा कोरोना संक्रमितको संख्या ह्वात्तै बढेको छ ।

शुक्रबार ९६८ जनामा संक्रमण पुष्टि भएको हो । स्वास्थ्य तथा जनसंख्या मन्त्रालयका अनुसार ८ हजार २७२ पीसीआर परीक्षण गर्दा ५७२ जनामा र ६ हजार ६९९ एन्टिजेन परीक्षण गर्दा ३९६ जनामा संक्रमण पाइएको हो ।

बिहीबारको तुलनामा शुक्रबार झण्डै दोब्बरले कोरोना संक्रमण बढेको छ । बिहीबार ५४० जना संक्रमित थपिएका थिए । उक्त संख्याको तुलनामा कोरोना संक्रमण पुष्टि हुने संख्या आज ४२८ ले बढि हो ।

मन्त्रालयको नियमित अपटेड अनुसार २४ घण्टामा कुनै संक्रमितको निधन भएको छैन । तर सोहि अवधिमा २६२ जना संक्रमण मुक्त भएका छन् । अहिले नेपालमा ५ हजार ७४१ जना सक्रिय संक्रमित छन् ।

आज थपिएका संक्रमितमध्ये काठमाडौंका २८४ जना, ललितपुरका ६२ जना र भक्तपुरका २३ जना रहेका छन् । यस हिसाबले एक दिनमा उपत्यकाभित्र ३६९ जनामा संक्रमण पुष्टि भएको छ ।