धादिङमा एक महिनामा १३ जनाले आत्महत्या गरे

विदुर खबर २०७८ भदौ ८ गते २०:३२

नुवाकोट । धादिङमा पछिल्लो केही वर्षयता आत्महत्याका घटना बढ्दै गएको छ ।

Advertisement

गएको तीन वर्षको तथ्या‌कलाई हेर्दा गत आर्थिक वर्ष ०७७–७८ मा आत्महत्या गर्नेको संख्या सबैभन्दा बढी देखिएको हो ।

आव ०७५–७६ मा ९३ जना, ०७६–७७ मा ९४ जनाले आत्महत्या गरेको प्रहरीको तथ्या‌कमा उल्लेख छ । आव ०७७–७८ मा मात्र त्यो संख्या बढेर १४२ जना अर्थात् २८ दशमलव ९८ प्रतिशत पुगेको जिल्ला प्रहरी कार्यालयको तथ्यांकले देखाएको छ ।

Advertisement

धादिङमा एक महिनामा सरदर १३ जनाले आत्महत्या गर्ने गरेका छन् । आत्महत्या गर्नेमध्ये सबैभन्दा बढी विष सेवन गर्ने रहेको प्रहरी तथ्यांकमा उल्लेख छ । त्यसमा पनि पुरुषको संख्या बढी छ ।

त्रि–वर्षिय आत्महत्याको विश्लेषण गर्दै धादिङका प्रहरी उपरीक्षक महेन्द्र खड्काले दिनको समयभन्दा रातको समय र अन्य दिनकोभन्दा बिदाको समय (शनिबार) आत्महत्या गर्नेको संख्या धेरै बताए ।

Advertisement

अरुले थाहा पनि नपाउने र एक्लोपनको अनुभूति हुने भएकाले मध्यराति १२ देखि बिहान ६ बजेको समयमा आत्महत्याका घटना धेरै हुने गरेको एसपी खड्का बताउँछन् ।

आत्महत्या गर्नेहरुमा १६ देखि ३० वर्ष उमेरका अधिक छन् भने ६० वर्षदेखि माथि उमेर समूहका पनि देखिएका छन् । वैदेशिक रोजगारका सामाजिक असर, आर्थिक अभाव, पारिवारिक अवहेलना, असफल प्रेम, लागूऔषध, परीक्षामा असफलता, घरेलु हिंसा, गरिबीलगायतका कारण १६ देखि ३० वर्ष उमेर समूहका तन्नेरीहरुले आत्महत्या गर्ने गरेको प्रहरीको अनुसन्धानले देखाएको छ ।

प्रतिक्रिया