नुवाकोटमा साढे ६ हजार कोरोनामुत्त

नुवाकोट । नुवाकोटका साढे ६ हजारभन्दा बढी कोरोनामुत्त भएर घर फर्किएका छन् ।

स्वास्थ्य कार्यालय नुवाकोटका अनुसार पछिल्लो २४ घण्टामा जिल्लामा ५५ जना कोरोना संक्रमित कोरोनामुत्त भएर घर फर्किएसँगै जिल्लामा कोरोनामुत्त भएर घर फर्कनेको संख्या ६ हजार ६ सय ४७ पुगेको हो ।

यस्तै पछिल्लो २४ घण्टामा जिल्लामा ६१ जनामा कोरोना संक्रमण पुष्टि भएको छ । पछिल्लो २४ घण्टामा एकसय १४ जनाको पिसिआर र ३६ जनाको एन्टीजेन परिक्षण गर्दा ६१ जनामा कोरोना संक्रमण भएको स्वास्थ्य कार्यालय नुवाकोटका सुचना अधिकारी उत्तमराज खनालले जानकारी दिए ।

यससँगै जिल्लामा कोरोना संक्रमितको संख्या ७ हजार ३ सय २१ पुगेको छ । पछिल्लो २४ घण्टामा सबैभन्दा बढी विदुर नगरपालिकामा ४० जना कोरोना संक्रमित थपिएका छन् ।

यस्तै बेलेकोटगढी नगरपालिकामा ६ जना संक्रमित थपिँदा, तादी र किस्पाड गाउँपालिकामा समान ५ जना संक्रमित थपिएका छन् । त्यस्तै पन्चकन्या गाउँपालिकामा ४ जना र तारकेश्वर गाउँपालिकामा एकजना संक्रमित थपिएका छन् ।

यससँगै जिल्लामा सक्रिय कोरोना संक्रमितको संख्या ६ सय ३६ पुगेको छ । सक्रिय कोरोना संक्रमितमध्ये ५ सय ७८ जना होम आइसोलेसनमा, ४१ जना अस्पतालमा र १७ होम आइसोलेसनमा उपचाररत रहेका छन् ।

जिल्लामा हालसम्म कोरोना संक्रमणबाट ४२ जनाको मृत्यु भइसकेको छ । नुवाकोटमा अहिलेसम्म २४ हजार ७ सय जनाको पिसिआर परिक्षण गरिएको छ ।

विदुरमा थप ४० जना संक्रमित थपिए

यसैविच विदुर नगरपालिकामा दैनिक कोरोना संक्रमितको संख्या बढ्दै गएको छ ।

यसैक्रममा बुधवार नगरपालिकाका थप ४० जनामा कोरोना संक्रमण पुष्टि भएको छ । संक्रमितमध्ये २२ पुरुष र १८ महिला रहेका छन् ।

यससँगै विदुर नगरपालिकामा कोरोना संक्रमितको संख्या २ हजार ७ सय ७५ पुगेको छ । संक्रमितमध्ये एकहजार ६ सय ८१ पुरुष र एकहजार ९४ जना महिला रहेका छन् ।

अहिले नगरपालिकाका २ सय ६० जना होम आइसोलेसनमा उपचाररत रहेको स्वास्थ कार्यालय नुवाकोटले जानकारी दिएको छ ।

विदुर नगरपालिकामा हालसम्म ३ हजार ७ सय ८ जनाको पिसिआर परिक्षण गरिएको छ ।