विशेष अधिवेशन मार्फत संवैधानिक संकट टार्नुपर्छ : अर्जुननरसिंह केसी

नुवाकोट ।  नेपाली कांग्रेसका केन्द्रीय सदस्य अर्जुन नरसिंह केसीले महाधिवेशन नहुने भएपछि हुन्छ हुन्छ भन्नुको कुनै अर्थ नभएको बताउनुभयो ।

वडा, गाउँ र क्षेत्रीय अधिवेशनको समय घर्किसकेको र केन्द्रीय महाधिवेशन आउन तीन हप्ता बाँकी रहँदा महाधिवेशन हुन्छ हुन्छ भन्नुको कुनै अर्थ नभएको उहाँले बताउनुभयो । अब के गर्न सकिन्छ विकल्पहरु खोजी गरी छलफल गर्न ढिला भइसकेको केसीले बताउनुभयो ।

केसीले विशेष अधिवेशन गर्न मागसमेत गर्नुभयो । समय घर्किसकेको र संवैधानिक संकट निम्तिने भएकाले विशेष महाधिवेशन गरेर पार्टीको आधिकारिकताको संकट टार्नुपर्ने उहाँको तर्क छ ।

केन्द्रमा नसकिए सात प्रदेशमा गर्ने, नभए तत्कालीन १४ अञ्चलमा र त्यति नै नभए ७७ जिल्लामै विषेश अधिवेशन गरेर पार्टीलाई संवैधानिक संकटबाट एक वर्ष पर सार्न सकिने उहाँले बताउनुभयो । विशेष अधिवेशन नगरे नेपालको संविधानलाई सम्बोधन गर्ने गरी अन्य विकल्प खोज्न पनि केसीले सुझाउनुभएको छ ।

केही साथीहरुले कोरोनालाई शून्य समय मानेर महाधिवेशन गर्नुपर्ने भनाइ आएकाे भएपनि त्यो तर्कसंगत नभएको उहाँको जिकिर छ । ‘शून्य समय ट्याक्स तिर्नेका लागि हाे’, उहाँले भन्नुभयाे, ‘पार्टीकाे महािधवेशनका लागि हैन ।’

क्रियाशील सदस्यता विवादका विषयमा कुरा गर्दै कोहीले गुट उपगुट नहेरी क्रियाशील वितरण गरे कुनै समस्या नआउने उहाँले बताउनुभयो ।