संगम सहकारीले दियो त्रिशुली अस्पताललाई आइसीयू बेड र मनिटर

नुवाकोट । नुवाकोटको विदुर नगरपालिका वडा नम्बर ४ बट्टारमा रहेको संगम सहकारीले त्रिशुली अस्पताललाई आइसीयू बेड र मनिटर हस्तान्तरण गरेको छ ।

आईतवार सहकारीका पदाधिकारीहरुले अस्पतालका व्यवस्थापक रिकेस रानालाई दुई वटा आइसीयू बेड र मनिटर हस्तान्तरण गरेका हुन् । यस्तै, सहकारीको थप आर्थिक सहयोग र विदुर नगरपालिका–९ कोलेनी निवासी तथा ओकेयामा इन जापानका संयोजक नवराज बस्नेतद्वारा प्राप्त अर्को बेड र मनिटर विदुर नगरपालिका वडा नम्बर ९ का अध्यक्ष शनि चित्रकार मार्फत अस्पतालका व्यवस्थापक रानालाई हस्तान्तरण गरेको छ ।

नवराज बस्नेतद्वारा प्राप्त आईसियु बेड र मनिटर हस्तान्तरण गर्दै विदुर नगरपालिका वडा नम्बर ९ का अध्यक्ष शनि चित्रकार कोरोना भाइरसविरुद्ध लड्न सरकार मात्रै नभएर समाजका सबै अंगको उत्तिकै भूमिका रहने भएकोले सहकारी र सहकारीको समन्वयमा ओकेयामा इन जापानका संयोजक बस्नेतको सहयोगमा उक्त सामाग्री सहयोग गरिएको सहकारीका अध्यक्ष श्रेष्ठले बताए ।

हस्तान्तरण गरिएको आईसियु बेड र मनिटरको मूल्य करिब ३÷३ लाख रहेको सहकारीका कोषाध्यक्ष दिनेशकुमार श्रेष्ठले बताए । अस्पतालका व्यवस्थापक रानाका अनुसार हाल ६ आईसियु र ४ भेन्टिलेटर गरि १० बेड रहेकोमा अबदेखि कोभिड उपचारको लागि आईसियु बेड १२ पुगेको छ ।

सामाजिक उतरदायित्व बोध गरि यस प्रकारको सहयोगले नुवाकोट, रसुवा र धादिङको नागरिकले थप राहत पाउने सहकारीले जनाएको छ ।