शिवपुरीको आकर्षक गोकुलधुप झर्ना पुग्ने पदमार्ग निर्माण गरिने

शिवपुरी । थानापतीको काँखमा रहेको घट्टेखोलाको गोकुल धुप झर्नामा स्थानीयहरुको आकर्षणको केन्द्र बन्दै गएपछि शिवपुरी आठ वडा कार्यालयले यहाँसम्म पुग्ने पदमार्ग तथा पिकनिक स्पोटर्स निर्माण गर्ने भएको छ ।

आज स्थानीय वासिन्दा संग कुराकानी गर्दै सोही वडाको वडाअध्यक्ष पदमबहादुर थपलियाले उक्त क्षेत्रलाई पर्यटकीय क्षेत्रको रुपमा विकास गर्न छिट्टै काम सुरु गर्ने बताउनुभयो । करीब ६० मिटर अग्लो झर्नाको मनोरम दृश्य माथिबाट झरिरहेको पानीको आकर्षक छहरा, वरिपरि हरियाली जंगल मन लोभ्याउने प्रकृतिको सुन्दर उपहार, अनुपम र आकर्षक छहरा स्थानीय बासिन्दाहरुको गर्मीमा सितलता प्राप्ति गर्ने अनि सेल्फी र टिकटक बनाउने आकर्षक स्थल बनिरहेको छ ।

पूर्वाधारको विकास गर्न सके उक्त झर्नाले गाउँपालिकालाई आर्थिक स्रोत सङ्कलन गर्न धेरै सहज हुने स्थानीय बासिन्दा जितबहादुर तामाङको भनाइ छ । धार्मिक महत्व वोकेको उक्त झरना नजिकै गोकुल धुपको बोट रहेको छ ।

भगवान कृष्णले यसै झर्नामा नुहाउने गरेकाले भगवान कृष्णले पाइला टेकेकोले यो ठाउँमा गोकुल धुपको विरुवा उम्रिएको बुढा पाका बताउँछन्।