कोरोना भाइरसको खतरनाक प्रजाति नेपालमा पनि देखियो

कोरोना भाइरसको खतरनाक प्रजाति नेपालमा पनि देखिएको छ ।

विश्व स्वास्थ्य संगठनको समन्वयमा नेपालको विभिन्न स्थानबाट संकलन गरिएको नमुनामा देखिएको यस भाइरसका कारण अझ गम्भीर महामारीको अवस्था सिर्जना हुन सक्ने सम्भावना बढेको छ । स्वास्थ्य मन्त्रालयले सार्वजनिक गरेको यस रिपोर्टप्रति सबैको ध्यान केन्द्रित छ । मन्त्रालयका अनुसार नेपालमा कोरोना भाइरसको तीन प्रकारको प्रजाति भेटिएको छ । गतवर्ष देखिएको पुरानो प्रकार एक हो भने अन्य दुई प्रकार नयाँ हो ।

अहिले भेटिएको भेरियन्ट सबै उमेर समूहमा लाग्न सक्ने धेरै संक्रामक र जोखिमपूर्ण रहेको स्वास्थ्य मन्त्रालयले जनाएको छ । यो नतिजा कोरोना संक्रमितहरुका ३५ वटा नमुनालाई विश्व स्वास्थ्य संगठनको समन्वयमा भारतमा जिन स्विक्विन्सिङ गर्दा ९७ प्रतिशत (३४ वटा) मा बि–वन–छ सय सत्र दुई संकेतका नयाँ भेरियन्ट र तीन प्रतिशतमा बि–वन–छ सय सत्र वन संकेत पुष्टि भएको जनाइएको छ ।

विश्व स्वास्थ्य संगठनले २०२१ मे १० मा यो नयाँ भेरिन्यटलाई विश्वव्यापी भेरिन्यट अफ कन्सर्न भनी घोषणासमेत गरेको छ । यी दुवै भेरियन्ट भारतमा भेटिएका कोरोनाका नयाँ प्रजाति हुन् । दुवै भेरियन्टबाट महाराष्ट्र र आन्द्र प्रदेश बढी प्रभावित छन् । नेपालमा यसअघि बेलायतमा भेटिएको बि–एघार–सात भेरियन्ट पनि भेटिएको थियो ।

यस रिपोर्टले सबैलाई चिन्तित तुल्याइरहेका बेला राजनीतिक दलका नेता तथा सरकार सत्ताको खेलमै लिप्त छन् । उनीहरुले कोरोना संक्रमणको महामारी फैलने क्रम बढ्दै गएपछि स्वास्थ्य सुरक्षा अपनाएर जो जहाँ छ त्यहीं सुरक्षित भएर बस्ने वातावरण बनाउन सकेनन् । सरकारले कोरोना संक्रमणको जोखिममा रहेका नागरिकलाई शहर छोडेर गाउँ जाने समयावधि तोक्दै कोरोना संक्रमणको पोको लिएर गाउँघर फर्कन बाध्य बनायो ।

यही बाध्यताका कारण बिनास्वास्थ्य परीक्षण र बिनासुरक्षा गाउँघरमा पुगेका युवा शक्तिले वृद्ध बाबुआमाका साथ, बालबालिका, छरछिमेक हुँदै गाउँबस्तीमा नै फैलाउने अवस्था सिर्जना भयो । सरकारको अदूरदर्शिताका कारण आज कोरोना संक्रमणका कारण ज्यान गुमाउनेको संख्या दैनिकजसो बढ्दो छ । यति बेला कुर्सीको लडाइँमा उत्रेका नेता हैन सर्वसाधारण जनता मात्र कोरोना संक्रमणको शिकार बनेका छन् । गाउँ–गाउँमा कोरोना संक्रमणका कारण मृत्यु भएका व्यक्तिको लास उठाउने र त्यसको व्यवस्थापन गर्ने कामसम्म चुनौतीपूर्ण बनेको छ ।

मृत्यु हरेक व्यक्तिको सुनिश्चित छ । त्यसैले पदका लागि आज जनतालाई बेवास्ता गर्दै कुर्सीका लागि लडिरहेका नेताहरुले पनि अजम्बरी पाएका छैनन् । आम नागरिकले आशा र भरोसा गरेर उपल्लो पदमा पु¥याएका हुन् र भोलि तिनै नागरिकले आजको मूल्यांकन गरेर सडकमा पनि पु¥याउन सक्छन्, पदको दम्भ देखाएर जनतालाई बेवास्ता गर्दाको परिणाम सोचेर देश र जनताको स्वास्थ्यका विषयमा गम्भीर हुनुमै भविष्य छ ।

अहिले जति पनि गम्भीर खालका कोरोना संक्रमित छन् ती खोप लगाउनबाट वञ्चित व्यक्तिहरु भएको विश्व स्वास्थ्य संगठनले औंल्याइसकेको छ । तर, सरकार खोप ल्याउन जुन रूपमा सक्रिय हुनुपथ्र्यो, हुन सकिरहेको छैन । यो दुर्भाग्यपूर्ण स्थिति हो ।