आज घोडेजात्रा : संक्रमण फैलने डरले औपचारिकतामा सीमित हुने

विदुर खबर २०७७ चैत २९ गते ६:५३

नुवाकोट । प्रत्येक वर्ष चैत्र कृष्ण औँसीका दिन मनाइने घोडेजात्रा पर्व आज मनाइँदै छ ।

Advertisement

उपत्यकामा कोरोना भाइरस  संक्रमण पुनः बढ्न थालेकाले सीमित व्यक्तिलाई आमन्त्रण गरी औपचारिक कार्यक्रमात्र गरिने नेपाली सेनाले जनाएको छ। आम मानिसमा भाइरस संक्रमण नफैलियोस् भनी सतर्कता अपनाउँदै कार्यक्रमलाई निरन्तरता दिइएको  सेनाको भनाइ छ। 

जनविश्वासअनुसार टुँडिखेलको पूर्व–दक्षिण दिशामा रहेको एउटा रूखमा बास गर्ने गुरुमापा भन्ने राक्षसले शहरका बालबालिकालाई खाने गरेको थियो। प्रत्येक वर्ष चैत्र कृष्ण औँसीका दिन घोडेजात्रा गरी गुरुमापाको आत्मालाई घोडाको टापले कुल्चाएर दबाउने गरिएको हो।

Advertisement

साथै शहरका कुनै पनि बालबालिकामाथि खतरा नहोस् भनी जात्राको दिन राति त्यहीँ रूखको फेदमा गुरुमापालाई खानेकुरा पनि दिइन्छ। यसो गरेपछि गुरुमापाबाट बालबालिकालाई  खतरा नहुने विश्वास राजधानीवासीमा छ ।

नेपाली सेनाका तर्फबाट आजै टुँडिखेलमा अश्वकला, मोटरसाइकल खेल, शारीरिक व्यायाम, युद्धकलालगायतको प्रदर्शन गरिन्छ। आजकै दिन ललितपुरमा पनि एउटा कानो घोडा दौडाएर घोडेजात्रा मनाउने परम्परा छ।

Advertisement

गत वर्ष कोरोना महामारीका कारण बन्दाबन्दी जारी गरिएकै दिन घोडेजात्रा परेकाले कार्यक्रम स्थगित गरिएको थियो। 

प्रतिक्रिया