नुवाकोटको सामारी दोभानमा अजैविक फोहोर छान्ने सेग्रिगेसन हाउस सञ्चालनमा

विदुर खबर २०७७ फागुन ५ गते १०:४१

नुवाकोट । नुवाकोटको विदुर नगरपालिकाले अजैविक फोहोर छान्ने सेग्रिगेसन हाउस सञ्चालनमा ल्याएको छ ।

Advertisement

विदुर नगर हाम्रो शहर, सफा स्वच्छ राख्ने सबैको रहर भन्ने नाराका साथ वडा नम्बर ९ सामरी दोभानमा स्थापना गरि सेग्रिगेसन हाउस संचालनमा ल्याइएको छ । एकीकृत फोहोरमैला व्यवस्थापन कार्यक्रम अन्र्तगत ८० लाख रुपैयाँको लगानीमा सेग्रिगेसन हाउस निर्माण गरिएको नगरपालिकाका मेयर सञ्जु पण्डितले बताए । केन्द्रीय सरकारको विशेष अनुदान शिर्षकबाट प्राप्त ४० लाख रुपैयाँ र नगरपालिकाको ४० लाख रुपैयाँ गरी ८० लाख रुपैयाँ सेग्रिगेसन हाउस निर्माण गर्न खर्च भएको मेयर पण्डितले बताए ।

यस्तै नुवाकोटका प्रमुख जिल्ला अधिकारी झंकनाथ ढकालले नगरपालिकाबाट उत्पादित फोहोरलाई वर्गिकरण गरेर व्यवस्थापन गर्दा आयआर्जनको श्रोत बन्ने बताए । उनले फोहोरलाई मोहोरमा परिणत गर्न सबै लागिपनुपर्ने बताए । प्रजिअ ढकालले स्वच्छ वातारणले आफ्नो स्थानीय तहको पहिचान बदल्न सहयोग गर्ने उल्लेख गरे । परिवर्तनको प्रयासहरु निरन्तर रुपमा भइरहे पनि त्यसलाई दिगो रुपमा सञ्चालन गर्न चुनौति रहेको प्रमुख जिल्ला अधिकारी ढकालले बताए ।

Advertisement

यसअघि विदुर नगरपालिकाले केही महिना अघि नै रङमा आधारित वर्गिकरण र बारमा आधारित सङ्कलन प्रणाली विकास गरेको छ । तर यो प्रक्रियालाई स्थानीयले कार्यान्वयन गर्न सकेको छैन । विदुर नगरपालिकामा दैनिक १४ टन फोहोर उत्पादन हुने गरेको छ । त्यसमध्ये ६० प्रतिसत नकुहिने फोहोर उच्पादन हुने गरेको छ । ती नकुहिने फोहोरलाई सेग्रिगेसन हाउसबाट छानिने नगरपालिकाले जनाएको छ ।

स्वच्छ र सफा नगर स्थापनाको लागि नगरपालिकाको १, २, ४, ६, ८ र ९ वडामा गरी ४१ वटा टोल विकास सस्था स्थापना गरिएको विदुर नगरपालिकाको विपद तथा वातावरण शाखाले जनाएको छ ।

Advertisement

प्रतिक्रिया