जनयुद्ध दिवसमा नुवाकोटमा शहिदको सम्झना

नुवाकोट । २६ औ जनयुद्ध दिवस नुवाकोटमा पनि विविध कार्यक्रमको आयोजना गरि मनाइएको छ ।

दिवसको अवसर पारेर नेकपाको प्रचण्ड नेपाल समुहले पार्टी कार्यालय विदुरमा एक कार्यक्रमको आयोजना गरेको हो । कार्यक्रममा बोल्ने नेकपा प्रचण्ड नेपाल समुहका अध्यक्ष हिरानाथ खतिवडाले सहिदहरुको त्याग र वलिदानले गर्दा नेपालमा लोकतानित्रक गणतन्त्र स्थापना भएको बताए । उनले देशमा शान्ति र संविधान ल्याउन लडेका शहिदहरुको भावना अनुसार अहिलेको सरकारले काम गर्न नसकेको भन्दै असन्तुष्टि व्यक्त गरे ।

यस्तै कार्यक्रममा विघटित प्रतिनिधिसभाका सांसद नारायणप्रसाद खतिवडाले सहिदहरुको त्याग र वलिदानलाई राज्यले सम्मान गर्नुपर्ने बताए । कार्यक्रममा विदुर नगरपालिकाका मेयर सञ्जु पण्डित, महिला नेतृ सुभद्रा नेपाल लगायतले सहिदको सपना अझै साकार नभएकोले संविधान र कानुनको रक्षाको लागि सबै एकजुट भएर अघि बढ्नुपर्ने बताए ।

कार्यक्रममा विभिन्न सरोकारवाला निकायहरुको उपस्थिति रहेको थियो ।